Az.R-ədə çanədə bekorə odəm heste.

Əhali sosial müdafiə vəzarəti sərdar Səlim Muslimovi bə jurnaliston votəşe ki, dəvardə sori Az.R-ədə 190 həzo tojə koə vırə oj kardəşone. Çəvonədə 148 həzo daimiə vırə bıə. Imən bə pionə sori nisbətədə 2 kərəsən veye. Devlətə müəssisonədə 40 həzo tojə nəfəron bə ko peqətəşone. Ey əlavə kardəşe ki, Respublikədə bekorəti problem ni.

Məşğuləti səviyyə çe Avropa navğədəmə məmləkətonsə barze. Bekorəti səviyyə İspaniyadə 19,6, Fransadə təğribən 10, Xorvatiyadə 12, Portuğaliyadə 11, İsveçədə 7, Niderlandədə 6 faizebu, çəmə respublikadə 5%-e

Çey ım sıxanon bəpeştə odəmiku jıqo qıley təsəvvur bə əməl omedə ki, əqər Niderlandədə bekorəti 5% bəbe, Az. R -ədə ım rəğəm yəğin ki, 4% əbi.

Muslumovi Respublikadə həmən beçizəti  de Avropa məmləkəton muğayisədə jinə səviyyədə be elan kardəşe. Votəşe ki, Macarıstanədə beçizəti 14,5, Portuğaliyadə təğribən 19, Rumıniyadə 25, Latviyadə 22, Litvadə 22,2, Yunanıstanədə 21, faizebu, Az.R-ədə 5,9 faize.

Mustəğil təhlilğəron Muslumovi bə Azərbaycani dair votə rəğəmon bovə kardedənin və ımoni çe hokuməti imitasiya hisob kardedən. Məmləkətədə real vəziyyət bekorəti və beçizəti ğat-ğat barzə səviyyədə be nişon dodə. Im təhlilğəron votedən ki, bekorə odəmon bə rəsmi ğeydiyyat sedənin. Həmən Az.R -ədə məvacibon nəinki Avropa kaminkişafinə devlətonsə, hətto Qurçistan və  Ermənistanisən xeyli kam, zəruri ərzağ məhsulon ğıymət isə çand bəjəm bohoe.