İmoninə odəm təkbir və salavat vote səbəbiku bə zindon dənoşone

Hacıyev Nofəl Ağcəbədi rayoni sakine. İmon əhle. Ağcəbədiədə şəhid sərbazi dəfn mərasimədə iştirak kardəşe. Əyo təkbir və salavat votəşe. Bı səbəbən de ım rayoni İcra hakimiyyəti sərdar Şahin Məmmədovi sifarişi məhkəmə əvış bə 2 manq zindonə cəzo məhkum kardə.

Boku hokuməti bə diqər siyasi fəalon əleyh repressiya siyasət həniən qıvonin bedə. "Azadlıq.info" huğuğ mudafiəəkə Oqtay Quləliyevi bı repressiya dair məğalə dərc kardəşe. Quləliyev nıvıştedə ki, fevralə manqədə hokuməti 40 nəfər siyasi və dini fəal dəstqir kardəşe. Bəvon 10 sutkəku tosə 60 sutkə həbs cəzo və ya pulə cərimə bıriəşe. Bə 4 nəfəri - Azərbaycan Ruhanion Məclisi uzv Şeyx Sərdar Hacıhəsənli, jurnalist Elçin İsmayıllı, siyasi fəal Elçin Fərəcov, bloqqer Mehman Ğələndərovi munasibətədə cinayətə ko bino kardəşone. Almaniyadə azərbaycanıjə siyasi muhacir bloqqer  Orduxan Babayev hokuməti tənğid karde səbəbiku çey 12 nəfər nezə əvlodon bə polis bardəşone, hətto bə 2 sınninə korpən rəhm kardəşon ni, əvonşon 1 sutkə əyo vəşi-təşi oqətə, çəyo çəvonədə bo 2 nəfəri  30 sutkə zindonə cəzo bıriəşone, bə əmandənion xəbərdarəti kardəşone ki, qirəm Orduxan ıştə siyasi fəaliyyəti dəvom bıko, çəvon vəziyyət həniən qıvonin bəbe.

Bə REAL hərəkati uzv Rahim Şaliyev və D18 hərəkati fəal Ğadir Ağakişiyevi polisədə işqəncə doəşone. Respublika Ombudsmani numayəndon bə çəvon şikayəti  qorə omən zindonədə dəvon qəp jəşone, əmo işqəncə fakton bı səfən bə ğeyd  səşon ni.