Bə Erməniston, ixracəkə kişvəron miyonədə İron 3minnə vırə soybe.
İroni ticori bə inkişof rəsə Təşkiloti yol de işorə bə İron və Ermənistoni miyono 3 milyard dollari ticorəti hədəf noey votışe: Rusiyə və Çin kişvəron bəpeşt, bə Erməniston səmt, ixracəkə kişvəron miyonədə İron 3minnə vırə soybe.
De məntəğə və dustə kişvəron iyən de hamsuyəon rabitəon inkişof doey, İroni dıvləti xarıci siyasəti vey muhimmə koon elan bıə.
İron bə coqrafiya mıvğiyəti xoto, 15 qılə kişvər ıştə hamsuyəti soybe və de məntəğə kişvəron və hamsuyəon rabitədə turizm, mədəniyət, sənaye, ticori və iğtisodi həmmə zərfiyəton əktiv kardey bə 2 ya çand qılə kişvəri əloğəon inkişofi bois bəbe və bə həminə vırə rəsey məntəğə sulh və stabiləti manafe boisəkəy.
Bə İrna raporti əsos, İrəvanədə de Ermənistoni ticorəti 1 rujə nımoyeşqoədə ki de İron İslom Respublika ticori mərkəz və Ermənistoni kişvəri vıjori zıney hədəfi icod bıə be, İroni ticori bə inkişof rəsə Təşkiloti yol Əlirıza Peymanpak təsdiğış karde: bə Ermənistoni İroni ixracati mığdor 437 milyon dollare və bə 2 qılə kişvəri miyono ticori bərnomə əsos bəpe bə 3 milyard dollar bırəse.
Peymanpak ijən bə İron və Ermənistoni vey çokə siyasi rabitəon işorəş karde iyən ticori bə inkişof rəseyro bə 2 qılə dıvləti irodə və həmçınin de Avrasiya ozodə ticorəti mığuviləon imzo kardeyro bə muzakirəon sə bey təkidış kardə iyən votışe: Avrasiya uzv bıə kişvəron miyonədə Erməniston yeqane kişvəre ki de İron mıştərəkə marzi soybe və karde bəzne İron və ım ittifoği vojori miyono bənə pard bıbu.
İroni ticori bə inkişof rəsə Təşkiloti yol ijən votışe: qaz və ruşna mıbodilə, Ermənistonədə İroni maşin soxtə kəson iştirok, Ermənistoni daxılədə və de mıştərik surəti sənaye məhsulon istehsol xususi İroni kə ləvozimon, muxtəlifə nımoyeşqohon bərpo bey, nat təmiz kardə zəvot bə istesmor rosniye, əcumlə de Ermənistoni İroni mıştərəkə bərnoməon bə hisob omeydə.
