21 qılə beynəlxalqə təşkilati Az.R həxədə bəyanat

Mədən Sənayeədə Şəffafəti Təşəbbusə Koalisiya nomədə qıley beynəlxalq təşkilat heste. Az.R 2003-minə soriku çey uzve. 2015-minə sori Boku hokuməti bə bəşəri huğuğon hurmət nıkarde, demokratiya prinsipon darışte səbəbiku ım təşkilatədə çey uzvəti dərəcə saru eğandəşone.

2016 -minə sori bə Azərbaycani de ım problemi həlli əlağədar konkret təklifon və de tosə ımsornə martə manqi vaxt doşone. Isət Az.R Naziron Kabineti bı barədə 2 qılə ğərar ğəbul kardəşe. Əmo ım ğəraron Koalisiya noə tələbi təmin nıkarde səbəbiku dınyo bənə «ARTICLE 19», «Human Rights Watch», «International Media Support» və diqər 21 qılə beynəlxalqə təşkilaton de bahəm bəyanati bə ım Koalisiya rəhbəriyyəti muraciət kardəşone ki, Az.R həmonə təşkilati tərkibo beğando.

"Azadliq.org" sayt nıvıştedə ki, Kolumbiyadə martə manqi 8 və 9-minə rujonədə Mədən Sənayeədə Şəffafəti Təşəbbusə koalisiya İdarə Heyəti  iclas dəbəvarde. Bı iclasədə Az.R-ədə bəşəri huğuğon vəziyyəti, Ğeyri Hokumət Təşkilaton fəaliyyəti ro mevcud bıə imkanon, Boku hokuməti bəştə ehdə peqətə təhhudon çı curə əməl karde, orəxnə vaxtonədə bə şəhrvandon nişon doə təzyiğ və təhdidon muzakirə bəkarden. Təhlilqəron votedən ki, koalisiya rəhbəriyyət bı muzakironədə həmonə 21 qılə beynəlxalqə təşkilaton bəyanati bənə əsas sənədi bə nəzər bəse.

Boku hokumət isə beynəlxalqə təşkilaton votə ittihamon rədd kardedə, məmləkətədə şəhrvandon huğuğ və azadion dırıst təmin be votedə.