Vitse-prezidenti fondi pur karde bə kom odəmon qiy epıştəşone

2005-minə soriku H.Əliyevi nomədə fond fəaliyyət nişon dodə. Çey prezident Mehriban Əliyeva bıe. Im fondi mədaxil-məxaric məsəlon barədə müxalifəti tərəfiku çand kərə parseşon bin ki, bə xalqi hesabat bıdo ki, bə fond pulon çe konco daxil bedə. Əmo bı 12 sori dırozi ım Fond həmişə devləti nəzarətiku, çe təftişiku kənoədə bıə. Vəhalinən Respublika həmə biznesmenon çok zınedən ki, çəvon rayoni rəhbəron həmişə əvon məcbur kardəşone ki, ıştə mənfəəti qıley yolə hissə bə ın fond ovoştınon.

Isət çoko ki, Mehriban Əliyeva vitse-prezident təyin be, bo eyoən qıley fond oj kardəşone. Çey nomən noəşone "Vitse - prezidenti fond". "Azərbaycan saatı" sayt xəbə dodə ki, bə rayonon icra sərdaron dəstur doəşone, əvonən ıştə rayoni biznesmen və hlrdə sahibkaron məcbur kardedən ki, bə Vitse-prezidenti fondi pul ovoştınon. Məsələn, Boku şəhəri Binəqədi rayoni biznesmenon səpe 10 həzoku tosə 50 həzo mənot xərac noəşone. Boku şəhəri inşaat muəssisonku tələb kardedən ki, çəvon dutə mənzilon i ğismi bə Vitse prezidenti mənzil fondi təhvil bıdon.

Im cürə reket, həmən rışvəxorə siyasət devləti təsisaton həmə vəsilon etənəşe. Yardımli rayoni icra sərdari büdcə təşkilati koəkon məvacibi i hissə qətm karde barədə məlumat doəmon be. İmişli rayoni sərdariən bı dəvardə rujonədə həmonə əməliku istifadə kardəşe.

"Politika.az" saytən nıvıştedə ki, de 8 Mart Zənənon idi əlağədar Hırdəlon şəhəri 3 numrəninə məktəbi direktor Sevil Əliyeva əmr doəşe ki, penə sinifi şaqirdonku 30, jinə sinifionku 25 mənot pul qırdə bıkon. Əv ıştə ım hərəkəton çand sore ki dəvom kardedə. Valideynon bı barədə çanədə şikayət kardəşone. Əmo ım direktori penə vəzifonədə himayədarış be səbəbiku əv ıştə ım rışvəxorə əməlonku hələən dast kəşedəni.

Devləti rəhbəriyyətədə əqər bə jıqo reketə əməlon rəvoc dodənbu, jinə aparati məmuronən hiç şəkk ni ki, ım cürə siyasəti dəvom bəkarden.