Dini vəyə kardəkəsşon bə "Bandotdel" barde.
Martə manqi 6-minə ruji İslam İnğilabi rəhbər Seyid Əli Xameneyi ağa de İlham Əliyevi vindemonədə bey votışe ki, Azərbaycan devləti mənafe de ıştə xalqi məzhəbi hisson muvafiğ beədey. Bə xalqi peştıpur be xarici ğıvvon vədə devləti əmniyyəti təmin karde əsas amile.
"İslamazeri.az" sayt nıvıştedə ki, Xarici Koon vəzir Məmmədyarovi bə Ərəb Əmiraton "əl-Fəcr" rujnomə musahibədə votəşe ki, həmmə islamə aləm Azərbaycani bənə islami molyəton sadiğ qıley məmləkəti zınedə.
Marti 4-ədə Fikrət Məmmədov nomədə qıley imoninə odəmi dini vəyə dəvuniəşe. Vəyədə Mısılmonon İbemonə Hərəkati tərəfdaronədə Əhsən Nuruzadə və "İmom Zaman" məçiti axund Haçı Habili iştirakşon bıə, və Taleh Bağırzadə ım vəyə təbrik əyo handəşone. Bı səbəbən əvonşon 3 kəsən bə "Bandotdel" bardə.
Qeyçay rayonədə polisi Ğıroni muəllim Nurlan Musayevış dəstqir kardə. Çey nezə odəmon bə "Maide.az" sayti votəşone ki, polison çey telefon və noutbuk musadirə kardəşone, çey ıştən bardəşone bə Boku.
Marti 6-ədə dini məhbis ruhani Hacı Abqil Suleymanovşon bə Şeyx Sərdari həbsi etirazə bəyanat doe səbəbiku bə karser dənoə.
"Azadlıq radiosu" həmonə ruji xəbə doşe ki, Ğuba rayonədə polisi reyd dəvunəşe. Tehron Əmiraslanov və 22 nəfər dindar dəstqir kardəşe. Səbəb əv bıə ki, əvon Tehroni kədə dini məçlis dəvunəşone. Polison 54 qılə dini kitob və 16 qılə audio kasetən musadirə kardəşone.
Marti 7-ədə Əhilbeyt (ə) məddah Kamran Fərat bə "Bandotdel" bardəşone.
Məştəğə ğəsəbədə qıley 1836-minə sori məsçit heste. Cəmi 41 kv.metre. Məçiti axundi bə "Bakıpost.az" sayti votəşe ki, məçit rıjidə. Bə təmiriş ehtiyac heste. Çand kərə bə Mədəniyyət Vəzarəti şikat kardəşone - əmo hiç qıley nəticəş bıə ni.
Boku hokuməti bə şəhrvandon dini mənəviyyati əsil munasibət ım cüre. Bo vərzeşə musabiğaton dəvunieyo de milyardon pul xarc kardedə, qıley qədə məçiti təmir karde ro pul peydo karde zınedəni.
