Fermeron zəmini çəvon dastonku sedən

Prezident İlham Əliyevi Respublikadə de pambəvonəti inkişafi əlağədar doə dəsturon bo məmləkəti heyvandarə fermeron bə qıley mısibəti səbəb bıə. Rayononədə de icra hakimiyyəti sərdaron rəhbərəti fermeron bə icarə peqətə zəminon traktor dənoəşone, romedən.

"Azadlıq radiosu" sayt marti 6-ədə Ğəbələ rayoni  fermeron icra hakimiyyəti bina vədə bə etirazə aksiya beşe barədə xəbə doəşe. Im hadisə bə nav Şaməxi fermeronən bə icra sərdari ğeyri-ğanuniə hərəkəti etiraz kardəşonbe.

İmişli rayoni Sarxanli diy fermeronən bə "Azadi" radio müxbiri votəşone ki, 3 həzo hektar sahədə 18 həzo hırdəsə və dıjdəsə mol-mələ vi-vay dodəmon. Əmə çok zınedəmon ki, Prezidenti pambəvonəti inkişafi ro dəstur doəşe. Əmo ey votəşe ki, beistifadə zəminonədə pambə bıkaşton. Həni votəş ni ki, divojə fermeron de ğanuni istifadə kardə zəminon çəvon dasto de zuy bısənon.

Imişli rayoni ım fermeron marti 7-ədə bə Prezident Adminstrasiya omən ki, ıştə şikayəti bəvon bırosnon. "Maide.az" sayt xəbə dodə ki, əvonşon vığandə bə Fevğəladə Məğamon Vəzarət. Çımi bə nav Səmaxi rayoni fermeronən ıştə şikayəti bə Prezidenti rosnie ro bə çey Adminstrasiya oməbin. Əmo əvonşon ğəbul kardənıbe.

Prezidenti təyin kardə məmuron bey tabeyin və çey əmri icra kardedən. Əqər ım məmuron har dəmədə ğanuni darıştedənbu və bımiro tanbeh bedəninbu, çimi məna əve ki, əvon bedune şəkk çe Prezidenti əmr və dəsturi bə vırə rosnidən.