İron və Rusiyə bə ticori mıbudiləon zumandəti təkid kardışone

İron İslom Respublika mərkəzi banki yol iyən Rusiyə fedrasiya yol 2tərəfi ticori rabitəonədə bə 2 qılə kişvəri milli pulon bə ko qətey təkidışon kardə.

Bə İran Peres aqentiyəti raporti əsos ki İrnaku raportış dodə, İron İslom Respublika mərkəzi banki yol, Muhəmməd Rıza Fərzin de Rusiyə fedrasiya mərkəzi banki yol Elvira Nabiyolina və çəy bə ico bıə heyəti vindemonədə bə 2 qılə kişvəri puli və banku mıbudiləon əlovə bey zərurət təkidış kardə və votışe: İron və Rusiyə ticori bankon miyono ticori mıbudiləonədə inkişof və zumandəti çəmə iminnə koonin.

Fərzin ım vindemonədə ijən bə İron və Rusiyə hevujə ticori zərfiyəton işorə və bə 2 qılə kişvəri strukturon həmkoətion əlovə kardey təkidış kardə.

İron İslom Respublika mərkəzi banki yol həmçınin bə ACU uzv bıə kişvəron putansiyelon işorə kardəş və Tehronədə Asiya əmtəə de əmtəə mıbudilə kardey ittifoği 51 minnə har sornə iclosi iştirokiro Rusiyəku dəvətış kardə.

Im vindemonədə  Rusiyə fedrasiya mərkəzi banki yol Elvira Nabiyolina həm ticori və iğtisodi həmkoətion inkişofi cəhətədə, bə 2 qılə kişvəri banki strukturonku vey çok istifodə kardey və puli və banki mıbudiləon zumandəti təkidış kardə və votışe: de puli və banki rabitəon nığıl iyən inkişof hədəfi, 2 qılə kişvəri mərkəzi bankon təxəssusi və texniki heyəton mıbudilə kardey həminə cəhətədə vey muhimme ki bəpe bə icro bırəse.