Milli Məclisi pensiya sınn ros kardışe

Martə manqi 10-minə ruji iclasədə Milli Məclis bə Pensiya həxədə ğanuni əlavə və əvəzon ğəbil kardışe. Tosə ısət merdon 63, jenon 60 sınnədə bə pensiya beşe huğuğşon hest bıe. Isət ım hədd, həm bo jenon, həmən bo merdon 65 sınn muəyyən bıə. Bo pensiya beşe ro lozim bıə ko stajən 5-10 sor ziyod kardəşone. Isət ım staj 20 soriku tosə 35 sor bənine.

Bə ğanuni ım əvəzon ımsornə iyulə manqi 1-minə rujiku tətbiğ bəkarden. Parlamenti muvafiğ komitə sədr Hadi Rəcəbli ım ğərar jıqo izah kardəşe ki, quya Respublikadə əhali miyonə umr dıroz bıə. Əmo təhlilqəron ımi təkzib kardedən və çimi səbəbi devləti maliyyə vəziyyəti qıonin beədə vindedən.

İğtisadşunas Revşən Ağayevi bə "Azadlıq.info" sayti votəşe ki, bə beynəlxalğ standarton əsasən, məmləkəti şəhrvandon miyonə umr çe pensiya sınnisə 12 sor ziyod bənine. İbə Milləton Təşkilati sənədonədə Az.R-ədə odəmon miyonə umri 70 sor be təsdiğ kardəşone. Navğədəmə məmləkətonədə ki, şəhrvandon miyonə umr 75-80 sore, sınnış 65 sorisə vey bıə odəmon cəmiyyəti 15-20%-i təşkil kardedən.  Az.R -ədə isə ım sınnədə bıə odəmon cəmi 7-8% - be səbəbiku çəvon miyonə umr 70 sorisən vey be nibəzne. De ım hisobi MM -i ım ğərari, həmən Hadi Rəcəbli votəyon hiç qıley əsas nişe.

Parlamenti ğəbul kardə tojə ğanuni, pensiyon baza hissəşən de minimum məbləği əvəz kardə. Çimi bə çəton pensiya minimum məbləğ 110 mənot təyin kardəşone.