Az.R -ədə məçiton miğdar çanədey?
"Maide.az"sayt nıvıştedə ki, Az.R-ədə 2 həzo 166 qılə məçit heste. Çəvonədə 209 qılə Nəxçivanədə , 135 qılə Bokuədə, əmandəyon rayononədə fəaliyyət nişon dodən. Dəvardə əsri 90-minə soriku xarici devlət və təşkilaton Respublikadə 119 qılə, çəvonədə Turkiyə 23, Kuveyt 73, Səudiyyə Ərəbıstoni 3, Ğətəri və İroni İslamə Respublika odəmə 1 qılə məçit inşa kardəşone. Kuveyti dutə məçiton 14 qılə təriğət təbliğ karde səbəbiku ıştə fəaliyyət ğət kardəşone.
"Arannews" sayt xəbə dodə ki, İlahiyyatçi və Əhli - beyt (ə) məddah Rasim Xudayi çand kərey ki, de telefoni vasitə təhdid kardedən. Bey tars omedən ki, əgər dini məclisonədə i kərən bo dini məhbuson azadi ro dıvo bıko, bəvədə çey barədə çiddi cəzo tədbiron bəvinden.
Azərbaycani İslamə Partiya sədr Mevsum Səmədov ijən bə karser dənoəşone. Çey vəkil Yalçin İmanovi bə Azadi radio votəşe ki, noyabrə manqi 28 -iku jıqoşə əvşon 3 kərə bə karser dənoə, 3 kərə tehmət və 1 kərə çəşnavi doəşone. Səmədovi zindoni daxili intizam ğaydon hiç vaxt darıştə nişe. Həbsxonə rəisi de ım vasitə əv bə ciddi rejiminə zindon ovoştonie məğsədış heste.
Bə dini fəal Kamran Fərati vəyədə çe Mısılmonon İbemonə Hərəkati marşi hande səbəbiku "bandotdel"ədə fiziki cəzo doəşone, təhdid və təhğir kardəşone.
"İslamazəri.az" saytən çe "A24.az" sayti Boku şəhəri kuçonədə bə divo dəçokniə qıley vərəğə şəkil pevolo kardəşe. Bə vərəğədə şəhəri əhali xəbədo kardedən ki, ıştə əğılon çe Vəhabi - sələfi tərəfdaron təsiriku muhafizə bıkon.
Nardarani hadisə məhbuson 2 qılə qrupi məhkəməonən dəvom kardedən. Çe Taleh Bağırzodə qrupi məhkəmə de kom ssenari şedəbe, ım məhkəməonən de həmonə plani bardedən. Məhbus Elçin Ğasımovi marti 10-minə ruji məhkəmə iclasədə de hakimi hesıbes kardəşe, bey votəşe ki, tı ıştən bo şohidon vəkiləti kardedəş. Cinayətkari yolə qılə hejo şımə ıştəniyon.
