Ğərəboği yol tələbış kardə: Azərbaycani səmtiku məntəğə mıhosirə sə bıbu

Zinə bandiyə Ğərəboği Ermənion sakin bıə baxşi yol, İ Bıə Milləton Təşkilot və beynəlxalğə ictimaku tələbış kardə: de Azərbaycan R. vositə məntəğə mıhosirə sə iyən milləti etosniyə vəy qətə bıbu.

Azərbaycan R. və Ermənistoni miyono otəşbasti muğavilə ki Milodi 2020 minnə sorədə Ğərəboği 44 rujə canqi bə oxo rosnişe və bə 3tərəfiyə bəyoniyə məşhure, tosə ısət çand kərə darşiyə bıə.

Əmmo ım miyonədə Laçini vey muhimmə koridori dəbastey barədə ki Boku oxonə hərəkət be və de Azərbaycani hərbiçion vositə əncom bıə, vey kişvəron rəsmi şəxson və insoni həxon təşkiloton tərəfo məhkum bıə və ım hərəkət 2 qılə kişvəri miyono vey dave icod kardey cəhətədə zınəşe.

De Laçini işğol bey vositə, təğribən 120 həzo nəfər Ğərəboği Erməni sakinon mıhosirədə hestin. Erməni rəsmi şəxson, Boku ım hərəkəti “ğovmi pok kardey siyosəti əncom doey” zənəşone və tojədən Avropa parlamenti uzvonku qıləyni  həm Azərbaycan R. səmtiku ım hərəkəti qıləy canqi cinoyət zınəşe və de Boku rəsmi şəxson, beynəlxalğə ictima ğoymə rəftori tələbış kardə.

Bə İran Peres aqentiyəti raporti əsos, bandiyə Ğərəboği yol, Arayik Harotoniyan bə qlobal ictima qıləy məktobədə nıvıştəşe: təğribən 2 manq bəbe ki hiç xorək, damon ehtiyaton və co qılə zəruri əmtəəon mevcud ni, qıləy holədə ki çımiku bənav ım məhsulon, de Rusiyə sulh mərominə ğıvvon iyən sıə hiloli beynəlxalğ komitə vositə hozzo bıdə, ısət Ğərəboğədə mevcud ni və Azərbaycan R. hərəkəton nə fəğət qlobal həxon darşiye bə hisob omeydə bəlkəm beynəlxalğə məxsusə həxon prinsipon darşiye həm heste.

Harotoniyan ijən əlovəş kardə ki Laçini roy mıhosirə de məntəğə həmmə milləti məhv kardey hədəfi, Azərbaycan R.  plan kəşə bıə siyosətonku i baxş bə hisob omeydə.

Bandiyə Ğərəboği yoli məktobi co qılə baxşədə omə, ım behron fəğət de beynəlxalğə siyosi iyən bəşərdustanə himoyəon həl bəbe.