Bokuədə hərbi mıştərəkə kamissiyaədə iştirokiro İroni hozzoəti

İroni silohinə ğıvvon həmmə ğərorqoh yol de Azərbaycan Respublika mudafiə vəziri telefoniyə votımonədə de bə 2 tərəfiyə hərbi iyən mudafiə həmkoəti inkişofi təkid kardey, Bokuədə hərbi mıştərəkə kamissiyaədə iştirokiro İron islom Respublika silohinə ğıvvon komilə hozzoəti elanış kardə.

Azərbaycan Respublika əcumlə İroni hamsuyəonkue ki dəvardə soronədə muxtəlifə baxşonədə de İroni həmkoəti hevujəti dumoədə be.

Bə Fars aqentiyəti raporti əsos, İroni silohinə ğıvvon həmmə ğərorqoh yol, Qeneral Muhəmməd Bağıri de Azərbaycan Respublika mudafiə vəzir Qeneral Zaker Həsənev telefoniyə votımonədə de işorə bə 2 qılə kişvəri silohinə ğıvvon miyono dəvardə soronədə erjinə sazışon təsdiğış kardə: həmmə baxşonədə 2 qılə kişvəri silohinə ğıvvon miyono rabitəon və həmkoətion bə inkişof səmti şeydə.

Qeneral Bağıri ijən əlovəş kardə: İron etığadış heste ki silohinə ğıvvon karde bəznen 2 qılə kişvəri miyono dusti iyən bıvəti əlovə bıkon.

İroni silohinə ğıvvon həmmə ğərorqoh yol ijən təsdiğış kardə: mıştərəkə marzonədə oroməti iyən əmniyyət icod kardey  fəğət de hamsuyə kişvəron miyono vəhdət iyən hamdıləti royku icod bəbe və məntəğədə xarıcion iştirok dave iyən ixtilofi bois bəbe.

Im telefonioyə votımonədə Azərbaycan Respublika  mudafiə vəzir həm əlovəş kardə: hərbi iyən mudafiə 2tərəfiyə həmkoətion səthi inkişofi barədə ım kişvəri silohinə ğıvvon komil surət hozzoe, əv ijən votışe: Azərbaycan Respublika həmişə İron İslom Respublika bənə dust iyən bəştə nez bey kişvər zıneydə və həmmə baxşonədə hərbi həmkoətionku himoyə kadedə.

Qeneral Zaker Həsənev ijən ıştə umo nışoş do ki Qeneral Zaker Həsənev  bızno nezə vəoməyədə və Bokuədə hərbi mıştərəkə kamissiyaədə İroni heyətiro vey çokə mizbon bıbu.