Beynəlxalq aləmədə hokuməti nufuz rujbəruj saru eqınidə

İlham Əliyevi hokumət dınyo miğyasədə ıştə nufuzi muhafizə karde ro çanədə budcə pulon xarc karde bə həmə kəsi çok məlume. Avropa Olimpiya hənəkon, İslami Həmrayə hənəkon, "Formula-1" musabiğat, xarici məmləkətonədə xeyriyyə tədbiron, elmiə konfrans və simpoziumon həmə bo Az.R nufuz ğəzənc karde məğsəd hestışe. Əmo hiçən təəccubinə ko ni ki, anədə tədbiron hiç qıley effekt dodəni, Azərbaycani hokuməti nufuz rujbəruj saru eqınidə.

Marti 10-də Mədən Sənayeədə Şəffafəti Təşəbbusi Koalisiya Boqota şəhərədə ıştə 36-minə iclasədə Azərbaycan hokuməti bəşəri huğuğon riayət nıkarde səbəbiku çey ım Koalisiyadə fəaliyyət de tosə  iyulə manqi 26-i oqətəşe. Çimi muğabilədə Boku hokuməti rəsmi numayəndə Devlətə Natə Fondi direktor əvəzi Şahmar Mevsumovi Az.R ım təşkiləti üzviətiku rəsmən beşe elan kardışe. Yəni ım beynəlxalğ təşkilat bə Boku hokuməti antidemokratik hərəkəton orəx doe məsləhət zınedə, əv isə bə dınyo ictimaiyyəti votedə ki, bəştə şəhrvandon munasibətədə  repressiya siyasəti həniən dəvom bəkarde.

"Azadlıq.info" bə BBC istinadən xəbə dodə ki, "Formula 1" direktor Azərbaycani hokumət tənğid kardəşe ki, əv dırozmuddətinə salemə biznes onoe ro hiç qıley ko kardedəni.

Hokumət daima bə Boku şəhəri inkişafi tənəvəc mande həxədə qəp jedə. Qıley "Merser" nomədə beynəlxalqə təşkilat heste. Əv har sor dınyo şəhəron təsnifati tərtib kardedə. Çey ımsornə məlumatədə Boku çe dınyo 231 qılə şəhəron arədə 199 -minə vırədə şəror qətəşe. Bə  İrəvoni 172, bə Tbilisi 187 -minə vırə doəşone. 

"Amnesty İnternational" beynəlxalqə bəşəri huğuğ təşkilati qıley tojə hesabat pevolo kardəşe. Əyo Az. hokuməti bə siyasi fəalon kiberhucumon təşkil karde barədə fakton hestin. İm təşkilati həmonə fakton bə hokuməti təğdim kardəşe.

Hokumətpərəst təhlilqəron Boku hokuməti xarici siyasəti im cur iflasi səbəbi çey murtəce əməlonədə ne, erməni lobbi fəaliyyəti nəticədə vindedən.