Mısılmonon İbemonə Hərəkatı İdarə Heyəti üzv dəstqir kardəşone

Martə manqi 14 -ədə şanqo Boku polis nəfəron bə dini fəal Elxan İskəndərovi kə hucum kəşəşone, əvşon dəstqir kardə. Bı həxədə "Azadlıq radiosu" xəbə doəşe. Çəyo Nəsimi Rayon Məhkəmə boəyo 3 manq 11 ruj muddətinə həbs bıriəşe. Çey vəkil Fariz Namazli votəşe ki, Elxan İskəndərovi bənə Nardarani hadisə məhbuson de Cinayət Məcəllə 10 qılə maddə ittiham kardedən. Əv Mısılmonon İbemonə Hərəkati İdarə Heyəti uzv bə.

Nardarani hadisə məhbuson 2 qılə qrupi muhakimən dəvom kardedə. Məhkəmədə əvon ifadə dodən, "Bandotdel"ədə bə çəvon sə çı hənqonon varde, bəvon bə normal insoni ağıli nomə ğeyri-insani işqəncon doe barədə qəp jəşone. Bı məhkəmonədə Az.R istintağ orğanonədə bə məhbuson çı curə dəhşətinə işqəncon doe barədə tojə fakton bə dınyo ictimaiyyəti oşko bedə, məlum bedə ki, hiç Hitleri Almaniya Qestapo zindodonədə bə əsiron bı curə həvəhşiə işqəncon dodənıbin.

Marti 16-ədə Şirvan Apellyasiya məhkəmə de Şeyx Sərdar Hacıhəsənli bə cinayətə məsuliyyət cəlb karde əlağədar şikayəti diə kardəşe. "Azadlıq. info" xəbə dodə ki, həmonə ruji polison bə Sirvan şəhəri roon ciddi nəzarət kardedəbin ki, çe Şeyx Sərdari tərəfdaron bə məhkəmə ome vəy bısənon. Vəkil Cavad Cavadovi votəşe ki, hətto bə məhkəmə bina dəşeyən bəvon mane bedəbin. Im bə odəmon etirazi səbəb be. Əlavə polis ğuvvon mudaxilə nəticədə jurnalist Arzu Abdulla və Revşən Əhmədli zədə seşone, Haci ilğar İbrahimoğlu və diqər 3 nəfər dəstqir kardışone, bardışone bə polis şebə. Apellyasiya məhkəmə, sıftənə məhkəmə ğərar əvəz nıkardışe, əvış ğıvvədə oqəte.

Mısılmonə aləmədə Şeyx Sərdari həbsi anədə əks-sədo doəşe ki, hətto Hindistani "Sədae Hussaini" rujnomə çəvrey ruhanion i ğismi Az.R hokuməti bə şiə alim və ruhanion munasibətədə bardə repressiya siyasət məhkum karde həxədə bəyanat pevolo kardəşe.