İron və Rusiyə bə cənubi Ğəfğazi məsələon həll kardey təkid kardışone

Rusiyə və İron İslom Respublika rəyison de məntəğə oxonə vəziyəti təğib kardey 2 qılə kişvəri miyono votımonədə bə cənubi Ğəfğazi məntəğə məsələon həll kardey zərrurət iyən 3+3 ğolibədə votımonon əncom bey və məntəğə mevzuon barədə xarıcion mıdoxilə nıkardey təkid kardışone.

Bə Prezdenti məlumatərosnə mərkəzi raporti əsos, İron İslom Respublika prezdent, Seyd İbreym Rəyisi bə Rusiyə prezdent Veladimier Putini telefoniyə təmasi cəvobədə, 2 qılə kişvəri rabitəon prossesi  vey çok zınəşe və 2 qılə kişvəri miyono bə mıştərəkə planon iyən sazışon icro bey təcili təkidış kardə ki ım baxşon əcumlə, tranzit, nəğliyot, enerji mıbodilə kardey iyən şimol-cənub koridori komil kardeye.

Rəyisi ijən BRİKS qrupədə İroni uzv beyro Rusiyə himoyəonku ğədrdonəti iyən əlovəş kardə: İron, və co qılə uzv bıə kişvəron miyono 2tərəfi, məntəğə və beynəlxalğə rabitəon hevujətiro çokə zəminə iyən çand ğotbış bıə dınyo icod kardeyədə, BRİKS qıləy təsirinə tojə təşkilatonkue.

Im telefoniyə votımonədə həmçınin Rusiyə prezdent Veladimier Putin təsdiğış kardə: dəvardə sorədə 2 qılə kişvəri ticorəti miğdor, rekord jey şoyid be.

Rusiyə prezdent ijən ıştə umo nışoş do ki har çəxtə rə Rəşt-Ostoro osınə ro iyən İron, Azərbaycan Respublika iyən Rusiyə bə yande reyls xətton dəçokney  icra bıbu iyən de işorə bə ım kişvəron miyono ticori mıbodiləon əlovə bey İRoni bənə Rusiyə stratejikə şərik zınəşe.