Ğəzzə və Ğəfğazi təhəvvulaton barədə İron və Rusiyə prezdenton məşvərəton

İroni İslomi Prezdenti offisi siyosi muavin, Ğəzzə iyən Ğəfğazi təhəvvulaton barədə İron və Rusiyə prezdenton məşvərətonku xəbəş do.

Fələstini muğaviməti ğıvvon bə sioniston cinoyəton cəvobədə, Milodi 2023 minnə sori Oktiyabrə manqi 7 minnə rujiku Ələğsa Tufan həmmə tərəfiyə əməliyot, işğol bıə sərzəminonədə bino kardışone.

Sioniston fociə omizə məğlubiyət, 1000 nəfəriku vey sioniston bə həlokət rəsey, kali qədə şəhron və hərbi bazaon dastiku doey bois bıə ki dəvardə rujonədə ım rejim yolon, çand kərə, bə Ğəzzə be qınohə millət və ğeyri hərbiçion həmlə bıkon və de ım şəhri mıhosirə kardey canqi cinoyət əncom bıdə.

Fələstini səhiyyə vəzorətxonə elanış kardə ki bə Ğəzzə tanqə sionist rejim həmlə zəmoniku tosə ısət, 2 həzo 750 nəfər Fələstinıjon şəhid bıən və 9 həzo 700 nəfər həm zəxmin bıən.

Bə İrna raporti əsos, İroni İslomi Prezdenti offisi siyosi muavin Muhəmməd Cəmşidi votışe: İron və Rusiyə prezdenton telefoniyə votımonədə sionist rejimi cinoyəton dəvomi barədə nota doə bıə be.

Cəmşidi ijən əlovəş kardə: Rəyisi, mıhosirə dəvom, jenon və hırdənon ğətliam kardey, bə Ğəzzə zəmini həmləon və bə çəy ğanuniyə devləti zərbə jəey, bois bıə ki ım canq dıroz və hevuj bıbu.