İslom dınyo əktivə jenon konfransi bəyoniyə

İslom dınyo əktivə jenon konfrans, bə israil, Azərbaycan R. Nati ixracati məhkum kardeyədə bəyoniyə muntəşir kardışone.

Qıləy şəroyetədə ki dınyo vey muhimmə təşkilaton və siyosi baxşədə bə nav şey iddioəkə devləton bəşər həxonku mudafiə kardeyku sıxən voteydən, israili sionist rejim həmmə dınyo iştirokədə ğeyri insoni cinoyəton əncom doey holədəy. bə Ğəzzə tanqə terroristiyə rejimi həvo səmtiku həmləon nəticədə 2300 nəfəriku vey hırdən şəhid və 5300 nəfəriku vey hırdən zəxmin bıən. Im həmləon nəticədə 33 qılə məçit, çand həzo jimoni bina, çand da qılə noxəşxonə və mo qılə zəruriyə binaon vironə bıən. Sionist rejim əlovə bə ım cinoyəton əncom doey, Ğəzzə tanqə ruşnə, qaz və ovi həm bırniyəşe və Fələstini mıhosirədə milləti məxsusə sərvəton həm bə çəvon səmt təhrim kardəşe.

Isət və Ğəzzə milləti miyonədə peşomeni ovi şiddətin kam bıə və bə ruşnə kam bey xoto, noxəşxonədə zəxmin bıə kəson be anesteziya bey cərrohəti əməliyoti jintonədə ğəror qəteydən. De ım vecud ki avari jintonədə zəxmin bıə kəson nicot doeyro vey maneon mevcude, zəxmin bıə kəson həmonə ləzzədə şəhid bəben. Bə ım illət ki avari jintonədə mardə kəson xarıc kardey vey di əncom bəbe, Ğəzzə xiyabonon vey bevəcə bu iyən de muxtəlifə noxəşətion qiriftorin.

De ım həmmə bəyon bıə fociəon, Amerkə iyən NATO kişvəron bə sionist rejim hərbi komək kardedən və Fələstini be qınohə milləti norohətinə marqiro şəroyet icod bəbe.

Əlovə bə ım Azərbaycan sionisti devlət həm israili terroristiyə rejimi nati təmin kardedə və de ım nati vositə israili təyyorəon Ğəzzə bombardımon kardedən.

Əmə bə mısılmonə bıvəon və hovəon tərəfiku, sionisti israili cinoyəton de şiddətin məhkum kardedəmon. əmə bə sionist rejim Azərbaycan R. Nati ixracati təcili oqətey tələb  kardedəmon və pidəmone ki islomi kişvəronədə ım ğeyri ğanuniyə rejimi səforətxonə tətil bıbu.

Əmə pidəmone islomi kişvəron və Azərbaycan R. Kişvərədə bə sionist rejimi vabəstə bıə fabikaon və şirkəton fəaliyət oqətə  iyən israili soxtə bıə məhsulon həvote ğədəğən bıbu.

Azərbaycan R. iyən kali islomi kişvəron məktəbxonəon və hırdənon boğçədə çəmə hırdənon sionist rejimi təbliğon huccumədə ğəror qətəşone və bə əvon israili mınhərifə fikon təlim doə bəbe.

Bə çəmə hırdənon, Fələstinıjon bənə deşmon iyən israli pesoxtə bıə rejim bənə dust zıney bıdə. əmə de şiddətin pidəmone ım duə reklamon vəy qətə bıbu. əmə Əliyev sionistə rejimi devlət iyən həmmə israil rejimi himoyəkəyon hərəkəton məhkum kardedəmon.