Devlət de rışvəxorəti çokney mubarizə bardedə

Az. R -ədə Prezident səviyyədə de rışvəxorəti mubarizə zərurəti barədə çand bəjəm votemonon bıən, Prezident Adminstrasiya sədr Ramiz Mehdiyev vəzifədaron qırdə kardedə bəvon çəşnavi dodə ki, rışvə se həni dəparçınon. Beynəlxalqə təcrubə nişon dodə ki, de ım mərəzi ən effektinə mubarizə de mətbuati vasitə ım fakton faş karde, jəqo məmuron nomi bə cəmiyyəti, həmən bə huğuğ muhafizə orğanon nəzə rosniye. Əmo ısət məlum bedə ki, Az.R -ədə hətto ım beynəlxalğə təcrubən əks nəticə dodə.

"Aztoday.az" sayt nıvıştedə ki, De Korrupsiya Mubarizə Sər İdarə  bə "Anaxəbər.az" sayti əleyh cinayətə ko bino kardəşe ki, ey quya  devlətə sırr faş kardəşe. Im sayti sər redaktor Azər Talıbovi bə "Cumhuriyyət.az"-i votəşe ki,  əmə bənə qıley jurnalisti Boku Dıyoə Ticarətə Limanədə bıə korrupsiya dair konkret fakron barədə məlumat pevolo kardəmone. De Korrupsiya Mubarizə Sər İdarə Respublika Sər Prokurori tono fəaliyyət nişon doə devlətə təşkilate. Çey vəzifə ğarze ki, bə çəmə nişon doə fakton dair təhğiğat bino bıko, ey səhv və ya durust be bə oşko beko,  bə cəmiyyəti bı barədə məlumat bıdo. Əmo təəssüfinə hole ki, ım İdarə təmom əks istiğamətinə hərəkəti rəvocış doə, bə çəmə əleyh cinayətə ko bino kardəşe.

Vəziyyət devləti diqər vəsilonədən ım curey. Rayonon icra sərdaron ğoldurə hərəkəti həxədə mutəmadi xəbon nıvıştə bedə. "Korrupsiya.az" sayti bə Tərtər rayoni icra hakimiyyəti sərdari talanqər siyasəti  dair qıley məğalə dərc kardəşe. Əmo həmə kəs zınedə ki, bə ım cinayətə fakton dair hokuməti huğuğ muhafizə orğanon hiç qıley tədbir əvindınin. İmən bey dəlalət kardedə ki, Az.R-ədə rışvəxorəti hejo devləti ıştən bardə qıley siyasəte.