Bə İrəvani ələyh Boku bıhton votey dəvom

Azərbaycan R., Ermənistoni rəsmi şəxson bə təhrikomizə sıxənon votey, mıttəhəmış kardə.

Cari Sentiyabrədə Erməniston de Azəri ğıvvon vositə, bandiyə Ğərəboği bə dast vardey sulhi təvafuği darşiye zınşe, Ermənistoni parlamenti yol, Alen Simoniyan Azərbaycan R.ku tələbış kardə ki de Azəri ğıvvon vositə, 31 qılə işğol bıə dion obəqardono.

Azərbaycan R. parlament həm bə ım tələb cəvobış do.

Bə Fars aqentiyəti raporti əsos, zinə Seşəmbə Azərbaycan R. parlament  bə Ermənistoni parlamenti sədri oxonə sıxənon cəvobədə de qıləy bəyoniyə muntəşir kardey vositə tələbış kardə ki dıroz mıddətəd sulhi icod kardeyro torixi fırsətiku istifod bıko.

Im bəyoniyədə ijən Azərbaycan R. parlament iddioş kardə jurnaliston cəmədə Alen Simoniyani sıxənon, məntəğədə həğiğətonku şomil nibəbe.

Qıləy holədə ki bandiyə Ğərəboği işğol kardey bə ım mənətğə 100 həzo sakin bıə Ermənion avarə bey bois bıə Azərbaycan R. parlament bə Simoniyan tovsiyəş kardə, 9 qılə şəhri viron kardey və Ermənistoni ğovmi pok kardey siyosəti nəticədə, bə 1 milyon Azəri avarə kardey xoto, Bokuku uzrxahi bıko.