AİP sədr Mevcum Səmədov ijən bə karser dənoəşone
Azərbayani İslamə Partiya sədr, dini məhbus Mevsum Səmədov ijən bə karser dənoəşone. Çey vəkil Yalçin İmanovi bə Azadu radio votəşe ki, martə manqədə ım çey 3-minə jıqo cəzoe. Bə doktor Səmədovu marti 6-ədə 5 sutkə, marti 16-ədə 3 sutkə karserə cəzo doəşonbe.
De Nəvuzə idi əlağədar çey ailə uzvon dey bə vindemon omeədə zindoni rəhbəriyyəti bımi imkan doəş ni, votəşe ki, Mevsum 2 manqnə karserə cəzo kəşənine. Vəkil İmanovi ımən votəşe ki, de ğanuni karser cəzo muddət 15 sutkəsən vey bıe nibəzne. De İdi əlağədar tətil bıe səbəbiku nə zindoni rəhbəriyyəti, nəən çe Penitensiar xidməti rəsmiyonku de ım koy əlağədar informasiya se mumkun bıə ni. Çəvon ım ğərari məğsəd əve ki, Mevsum Səmədovi sənibəton bə sırpuşə Ğobustani zindon bıvğandon.
İm xəbə Respublika cəmiyyətədə bə etirazi səbəb bıə. Azərbaycani Ruşinəfikron İbemoni sədr Eldəniz Ğuliyevi bə "İslamin səsi" sayti votəşe ki, "Dini Məhbuson Mudafiə Komitə" bı rujonədə fevğəladə iclas dəbəvune və bı hadisə ıştə ğıyməti bədo.
Dini Etiğad və Vicdanə Azadion Mudafiə Mərkəzi sədr ilahiyyatçi-alim Haci İlqar İbrahimoğlu, Bo Ğərəboği ro İslami Muğavimət Hərəkati sərdar Revşən Əhmədli, Huğuği mudafiəvon Qktay Quləliyev bə Səmədovi doə ım cəzo hokuməti tərəfo qıley sifariş və ğərəzkarə əməl zınəşone və məhkum kardəşone.
AİP Mətbuat Xidmətiən de ım hadisə əlaqədar doktor Səmədovi səhhətədə problrmon bə əməl ome ıştə norohəti ifadə kardəşe, və çimi məsuliyyət bə hokuməti qiy noəşe.
