Avrasiya saziş bo İroni məhsulon ixraciro dıjdə imkone

İroni sənaye vəziri muavin iyən ticorət inkişofı təşkiloti rəhbəri təkidış karde.:de Avrasiyə İttifoği ozodə ticorəti sazişi imzo kardey,İroniku əlovə erjin,bə elmi əsosl və bə sənaye molon Avrasiyə uzv kişfəron ixraciro qıləy çokə fırsəte.

Dekabrə manqi 25-ədə Rusiyə Sankt-Peterburq şəhrədə dəvordınə bıə mərosimədə İron İslom Respublikə və Belarus, Ğazaxıston,Ğırğızıston,Rusiyə və Ermənistoni məmləkəton bənə Avrasiya İxtisodi İbemoni uzvi ozodə ticorəti sazişışon imzo kardə.

İron İslom Respublikə tərəfiku sənaye,mədən və ticorət vəzir Əbbos Əliabadi dı sorisə ziyodə dəvomış bıə mızokirəon və ekspert koon nəticəş bıə ın saziş imzo kardey bıə.

Avrasiyə İttifoği tərəfiku həm bə ın ixtisodi ibemoni uzv məmləkəton sər vəziron mıovinon ın sazişışon imzo kardə.

Bə Sankt-Peterburqi səfədə və İroni de Avrasiyə İttifoğiı miyono ozodə ticorəti sazişi imzo kardey mərosimədə sənaye vəziri mışoyiət kardə  vəziri muavin və İroni ticorət inkişofı təşkiloti rəhbər Mehdi Zeyğəmi bın səfə çərçivədə de İrna aqentəti bıə interviyuədə votəşe ki,ın sazişi imzo kardey çe Avrasiyə İttifoği penc qılə uzv kişfəron bino bıə ozodə ticorəti sahədə çəmə iminə təcrubəy.

İroni ticorət inkişofı təşkiloti rəhbəri əlovəş kardə: 2020-ə sori de qırd devlətə onemon və şəxsi sektoron həmkoəti bino bıə ozodə ticorəti sazişi əloğədor dıroz mıddətinə diyaloqon nəticədə nəhoyətən,əmə çe molon 87%-i bə sıfır tarifi bırosnəmon.bə Zeyğəmi sıxanon əsos ın məsələ çı İroni əlovə erjin,bə elmi əsos və bə sənaye molon Avrasiyə uzv kişfəron ixraciro qıləy çokə fırsət icod kardedə.

İroni bənə Şanxay Həmkoəti Təşkiloti dayimi uzvi daxil bıey və 2024-ə sori sıftəku bənə BRİKS-i qrupi nuyə uzvi ğəbul kardey bədiqə de Avrasiyə İttifoği ozodə ticorəti sazişi imzo kardey,1402-ə Həşi sori çe İroni de coqlə məmləkəton ticorət mıbodiləon inkişofı istiğomətədə co qıləy muhimmə qəm bə hisab omeydə.