Az.R büdcə nırəsəy ki pur kardənine

Çe Avropa Şura Məmləkəton bə Korrupsiya Əleyh Təşkilat çand sore ki, bə Az.R hokuməti məsləhət zınedə ki, çey məmuron har sor ıştə ğəzənci barədə deklarasiya elan bıkon. Im de korrupsiya və rışvəxorəti, ıştə vəzifə səlahiyyətonku sui-istifadə əməlon mübarizədə effektinə vasitəy.

Əmo Boku hokumət ım təklifi ğəbil kardedəni, demiən ıştə rışvəxorə xisləti çe Avropa cəmiyyəti  vədə numayiş kardedə. Marti 17-minə ruji ım Təşkilati ıştə  hesabatədə ğeyd  kardışe ki, Az.R məmuron ıştə mılkon barədə deklarasiya dodənin. 

"Azadi radio" de ım məsələ əlağədar tədğiğat bardəşe. Məlum bıə ki, bə Prezidenti ailə, bə fevğəladə halon naziri aid xeyli miğdarədə şirkət və muəssison nom Respublika Verqi Vəzarəti siyahiədə ni. "Azadlıq.org" sayt 30 qılə jəqo şirkəti nom dərc kardəşe ki,  əvonən əksərən bə Prezidenti kinon - Leyla və Arzu Əliyeva aidin. "Azadi radio" ım şirkəton nomi Vergi reyestrədə nıbe səbəbi barədə bə Verqi Vəzarəti parseş vığandəşe, əmo çəğono bey hiç qıley cəvob doəşonni.

Naxçıvan Muxtarə Respublikadən vəziyyət ım curey. Əyo 442 qılə sənaye muəssisə fəaliyyətədey. Əmo ım respublika budcə 80% bə Mərkəzi hokuməti dotasiya hisob pur bedə. Ponə sori çıvrey həmə devlət və şəxsi şirkəton bə budcə cəmi 1 milyon mənot verqi avjor kardəşone. İğtisadşunas Natiğ Cəfərli Naxçıvani de Acarıstan Muxtarə Respublika muğayisə kardəşe, votəşe ki,  Acarıstan çe mərkəziku dotasiya sedəni. Çey əhali har 1 nəfəri bə budcə mədaxil de miyonə hisobi de çəmə puli 400 mənot, Naxçıvani əhali isə 158 mənote. Çimiən səbəb çıvrey 442 qılə muəssisə bənə Az. Pespublika  monopolist şirkəton ğəzinə ıştə mənfəəti çe Verqiku niyo kardeyədey.

Əqər məmləkəti iğtisadiyyat tamamən çe monopoliston inhisarədebu, və əvon bə devləti budcə verqi dodəninbu, devlətən bımi hiç çi votedənibu, bəvədə əv  budcə pur karde, əlbəttə ki, bəpe bə şəhrıvandon qiy bıno.