Mevsum Səmədovi bə karser dənoe səbəb məlum bıə

Azərbaycani İslamə Partiya sədr dini məhbus Mevsum Səmədovi Nəvuzə idədə bə karser dənoe səbəbiku de ıştə xeyzoni vindemon karde nıznəşe. Çey vəkil Yalçin İmanov marti 27-ədə zindonədə dey didorış bıə. Ey bə "Azadi radio" votəşe ki, zindoni rəhbəriyyəti bə Mevsum Səmədovi marti 18-minə ruji 3 rujnə karserə cəzo doəş be.

Marti 20-ədə nəvuzə idə şəvi  qıley ohilə məhbusi jıqo de şiddəti kuəşone ki, çey zikə həmə zindoni bina əhatə kardəşe. Im hadisə bə Mevsumi təsir kardəşe, ey bə nəzarətəvonon votəşe ki, hiç nıbo jıqo əzizə rujədə de insonon ım curə bəd rəftor məkənən. Çey ım sıxan səbəb bıə ki, zindoni rəisi əv bə 2 manqnə muddəti tənhoə kamera ovoştoniəşe. Vəkil İmanovi həmən ğeyd kardəşe ki, Səmədovi səhhətədə ciddi problemon hestin. Beynəlxalqə təşkilaton, huğuğə mudafiə komitə uzvon dəvət kardəşe,  çey vəziyyəti daima ıştə nəzarətədə oqəton ki, əv bə kritik hədd nırəso.

Marti 27-minə ruji Nardarani məhbuson i qrupi məhkəmə iclas dəvom kardəşe. Məhbus Seyid Elman Ağayevi ifadə doəşe. Bandotdelədə bey çanədə işqəncə doe, təhğir və təhdidon, de çey ailə üzvon şantaj karde barədə qəp jəşe. Həmən votəşe ki, "əmə əhle-Ğıronimon. Bəmə terrorçıə, odəm kıştə ittihamon doe hiç qıley əsas nişe. Çunki, ım curə hərəkəton bə çəmə qətə roy, bə çəmə əğeydə zidd əməlonin". Məhkəmə apreli 3-ədə dəvom bəkarde.

Masalu rayoni məhkəmən çe Azərbaycani Ruhanion Məclisi uzv Şeyx Sərdar Hacıhəsənli zindonə muddət 1 manqən, yəni de tosə apreli 30 -minə ruji ziyod karde barədə ğəror doəşe. Şeyx Sərdar polisi tərəfo fevrali 22-ədə dəstqir kardə bıə. Hokumət ey  dini  təbliğati barde dair ğanini tələbon darışteədə ittiham kardedə və bə çey əleyh cinayətə ko bino kardəşe.