İroni tərəfiku Moskva ətrofədə kardə bıə terrorə akt məhkum kardey bıə

İron İslom Respublikə çı Rusiyə poytaxt Moskva kəno ticorət mərkəziyədə bə ənəl omə xunin iyən vəhşiyə terror aktış məhkum kardə.

Bə tele-rədyo xəbə agentəti məlumoti əsos,İron İslom Respublikə xarici koon vəzir Huseyn Əmir Əbdullahiyan Moskva ətrofədə ticorət mərkəzədə kardə bıə terrorə akti məhkum kardə holədə,de həlok bıə kəson xıyzonon həmdardiş karde və bə Rusiyə xarici koon vəzir Sergey Lavrovi,bə Rusiyə hukumət iyən milləti səbəslomətiş doe.

Huseyn Əmir Əbdullahiyani voteşe: bə terrorizmi zidd mıştərək və effektivə mubarizə beynəlxalğ iştimoiyyəti ciddi və farğ nınoə holədə bıə hərəkəton tələb kardedə.Eyni zəmonədə,İroni xarici koon vəzərotxonə sıxanəvot Nasir Kənani Çafi Moskva ətrofədə de veyə rəğəmədə rusiyəvıjə vətəndoon həlok və zəxmin bıey orəxə ticorət mərkəzi xunin iyən vəhşiyə terror hucumış ğəti şikilədə məhkumış karde və bə Rusiyə hukuməti və xalği, xususən bə həlok bıə kəson xıyzonon səbəslomətiş doe.Nasir Kənani Çafi həmçinin elonış kardə ki,İron İslom Respublikə ım telə hodisədə ıştəni çı Rusiyə kəno vindedə.

Moskva ətrofədə bıə Krokas City Hall ticorət kompleksədə kardə bıə terrorə aktı nəticədə 67 nəfər mardə və 100-sə ziyodə inson zəxmin bıə.