Devlətə mılkon həvatə hərracon nəticə

Çe ponə sori sentyabriku Az.R bə Mılkon məsələ dair Devlətə Komitə 20 kərə hərrac dəvuniəşe. Bı hərraconədə 1700 devləti müəssisə və obyekt həvatəşone. Bı barədə Naziron Kabineti sabiğ şebə müdir Oqtay Həxverdiyevi bə "İstiPress" sayti votəşe. Ey ğeyd kardəşe ki, devləti ım muəssison həvateədə məğsəd çəvon effektinə koy təşkil kardeye ki, ım muəssisə hıriəkəs istehsali təşkil, tojə koə vırə oj , bə devlətə budjə verqi avjor bıko.

Əmo  hərraconədə həvatə bıə devlətə obyekton peşonə fəaliyyəti  həxədə nə Verqi, nə İğtisadiyyat Vəzarətonədə, nəən Mılkə məsəlon dair Devlətə Komitə sənədonədə hiç qıley məlumat ni. Çunki ım obyekton tojə xıvandon bə hərraci şərt və məğsədi əməl kardedənin. Həmonə muəssison oçınidən çey vırədə veyəmərtəbəninə binaon inşa kardedən. Imiən bə devləti iğtisadiyyati və bə məmləkəti umumdaxili istehsal məhsuli ziyod be, bekorəti bə kam kardə siyasəti hiç qıley koməqətiş bedəni.

Im hərraconədə bə devləti budcə çanədə pul mədaxil be barədən bə ictimaiyyəti məlumat dodənin.

Imən məlume ki, iğtisadi eksperton bə hərrac bekardə muəssison umumi molyəti 7 milyard dollar ğıymət noəşonbe. Tosə ısət ə obyekyon ki,  həvatəbə, çəvonku 1 milyard dollar bə dast vardə bıə. Əmandənə 6 milyard isə bə vo doəşone. Bı həxədə "Azadlıq.info" sayti xəbə doəşe.