Boku hokuməti "İlahiyyat" məçitədə cumə nomoj vote ğədəğən kardışe

Boku şəhəri mərkəzədə "İlahiyyat" məçit 1993-minə soriku fəaliyyət nişon dodə. Tosə ısət çey koədə hiç qıley noğsan bə nıbe. "Yeniçağ.az" sayt nıvıştedə ki, hokuməti ısət bı məçitədə cumə nomoji vote ğədəğən kardəşe. Çimi bə nav məçiti zəmini i hissən çeyku səşonbe.

"Hədəf14.org" saytən xəbə dodə ki, Ğəfğaz Mısılmonon İdarə mətbuat xidməti votəşe, "İlahiyyat" məçit ısət çe ım İdarə sərəncomədey. Çey əraziədə dini Tədrisə mərkəz inşa karde nəzərədə qətə bıə. Im bə məçiti fəaliyyəti mane nibəbe. Dindaron məçitədə ıştə ibadəti dəvom karde bəznen.

De Dini Təşkilaton əlağədar Devlətə Komitən bəyon kardəşe ki, bı məçitədə bə dini ayinon icra məhdudiyyət noəşon ni, sosial şəbəkonədə çey ocınie və ya dəbaste həxədə votəyon beəsosə qəponin.

Vəkil Cavad Cavadovi ıştə feyzbuk səhifədə nıvıştəşe ki, Masalu Məhkəmə hakim Nemət Musayev dini məhbus Şeyx Sərdar Hacıhəsənli zindonədə oqəte muddət tosə apreli 30 dıroz karde səbəb jıqo izah kardışe ki, "ey vadoe nibəbe, bə səbəb ki, əv ıştə cinayətə fəaliyyəti dəvom bəkarde". Çimi mənan əve ki, im hakim Şeyx Sərdari cumə nomoji vote cinayətə əməl hisob kardedə.

"Maide.az." saytiən çe Az.R ictimai - siyasi təşkilati rəhbər və fəalonədə 57 nəfəri bə respublika əlağədar təşkilaton de Şeyx Sərdari dəstqir karde əlağədar vığandə murciət dərc kardəşe. Dini Etiğad və Vijdanə Azadoin Mudafiə Mərkəzi, "Musavat"i, "Umid" partiya, "REAL" hərəkati, Azərbaycani Ruşinəfikron İbemoni, "Siyasi Məhbuson Monitorinq Mərkəzi", AXCP, Azərbaycani İslamə Partiya, , Huğuği Maarif Cəmiyyəti, "Turan" İnformasiya Aqentiyyəti və həniən co  təşkilaton Şeyx Sərdari bə zindon dənoe məhkum kardəşone, bə hokuməti təklif doəşone ki ey azad bıko.