Az.R-ədə həon miğdar boçi bə kam bedə?

Azərbaycanədə tarixən jiqo bıə ki, əhali hə və aspə qujd hardəş ni. Bı səbəbən Respublika Statistika İdarə məmləkətədə həon miğdari sorbəsor bə kam be həxədə elan kardə məlumat cəmiyyətədə qıley təşviş bə əməl vardəşe. Di Təsərrufat Vəzarətiən rəsmi numayəndə Ğalib Əbduləliyevi votışe ki, hə qujdi dınyo co məmləkətonədə hardedən. Ey bo insoni səhhəti ziyan nişe.

"Vesti.az" sayti  çey ım votəyon muğabilədə nıvıştışe ki, Vəzarəti ım rəsmiə odəmi votəyədə jıqo beşedə ki, co məmləkətonədə sıpə qujdən hardedən. Jəqo çəmə məmləkətədən bə sıpə qujdi həvate bəpe icazə bıdəy. Jıqo bışo, de ım məntiği nezə vaxtonədə bə camaati  vəzzəx və ya həşarət hardeyən təklif bəkarden.

"Musavat.com"-i muxbir bə Boku qıley qujdə vıjor subədəli şedə və çəvrey antisanitariya, tam hərc-mərc və ğeyri-ğanuni ticari şəraiti həxədə qıley reportaj hozo kardedə.

Im beaburinə xəbon bəpeştə Di Təssərufatə Vəzarəti tono Devlətə Baytarə Nəzarətə Xidməti  KurdƏmir rayoni Xınışli və Cəliləbodi Maşlığ  dionədə reyd dəvuniəşe. Xınışli diədə bo həvate ro hozo bıə 150 kilo aspə qujd, xeyli miğdarədə aspə heyvoni mandəyon, həmən ğəssobə diləqon oşko kardəşe. Im curə vəziyyət Maşlığ diədən bə dim beşə. Məlum bıə ki, ım diy sakin Abbasov Sağif  mutəmadi de aspi ğəssob karde və aspə qujdi Boku vıjoronədə həvate məşğule. Baytarə Nəzarətə Xidməti rəsmiyon çey soədə bə ım hərəkəton dair xeyli əşyaon oşko kardəşone, ğəssobə qujdon numunon bo ekspertiza ro bə labaratoriya  vığandəşone.

Rışvəxorəti tiğon kardə devlətədə jıqo nadurustə hərəkəton vəy se çətin ki, mumkun bıbo.