Hokuməti islahat tədbiron mahiyyət çiçiku ibarəte

İğtisadi behrani bino beku 2 sorisən vey vaxt dəvardə. İm kifayət ğədər muddəte ki, har qıley hokumət çe iğtisadi tənəzzuli vəy bısəno, məmləkəti bə inkişafə ro bekarde bızıno. Az.R devlətə rəsmiyon hələ ki, iğtisadiyyatədə bə real rosbemoni nail be zınə ni. Diə məkəmon ki, əvon daima çe behrani vəy seku, xeyli islahaton bardeku qəp jedən.

İlham Əliyevi apreli 4-ədə bə çəğənde istehsali stimul doe ro bə çey har toni 4 mənot subsidiya co karde həxədə fərman ğəbul kardışe. Çey bə navən pambə, kıvlə istehsali ziyod karde ro bə ım sahon subsidiya co karde barədə ğəror doəşbe. Əmo bo taxıl istehsali ro ço bə subsidiyon çı curə rışvəxoron tərəfo dələmurd karde nəticədə di təsərrufati ım sahə bə  tənəzzuli məruz mande  bə cəmiyyəti çok məlume. Rışvəxorəti tiğon kardə məmləkətədə ım pulonən bə korrupsionerə məmuron cif ru nıbe hiç kəs qarantiya doe nibəzne.

Jıqo vəziyyətədə de korrupsiya mubarizə imitasiya karde ro Milli Məclisədə qıley ğanuni layihə muzakirə bedə. Əqər əv ğəbul bibo, bəvədə bə ğeyri-ğanuniə ğəzənc bıə sərvət və aktivon devləti tərəfo ənəxəbədə həbs  noe mumkun bəbe. Isətijo vində bedə ki, ım ğanuni tamamən co istiğamət və məğsəd hestışe. Əqər İlham Əliyevi həğiğətən de rışvəxorəti mubarizə barde pidəşebu, jəğo bə Avropa təşkilaton məsləhəti muvafiğ ıştə məmuron har sor deklarasiya təğdim karde barədə fərman bıdo. 

"Korrupsiya.az" sayt  Ağdam, Bərdə, Qerənboy rayon icra sərdaron çe budcə təşkilati koəkonku pul qırdə karde faktonku məğalon dərc kardəşe. Imon və bənə bımon çanədə jıqo fakton oşko nişon dodə ki, Əliyevi hokuməti de rışvəxorəti mubarizə barde məğsəd nişe. Tarixi təcrubən subut kardəşe ki, rışvəxorə məmləkətədə  devləti  ğanunon hiç vaxt bəştə məğsəd rəsedənin.