Аz.R iğtisadiyyat əhali de mivə-tərəvəzi təmin karde imkanədə ni

Soveti vaxtonədə bə Az. SSR-i "Umumittifağə bostan" əvotin. Çunki, çe Rusiya şəhəron istehlak kardə mivə-tərəvəzi xeyli hissə ım respublika istehsal əkey. Isət həmonə vaxtonku 26 sor dəvardə. Az.R di təsərrufati tənəzzul bə qıley səviyyə rəsə ki, ısət iyo bə mivə- tərəvəzi daxili tələbat bə idxali hisob təmin bedə.

Aprelə manqi 7-ədə Rusiya Kemruqə Xidməti  de Baytar və Fitosanitar Nəzarəti numayəndon omən deştə Az.R həmkaron vindemon dəvniəşone. Azərbaycaniku bə Rusiya mivə - tərəvəz məhsuli ixracədə mevcud problemon muzakirə kardəşone. Çunki, məlume ki, Rusiya bə Turkiyə di təsərrufati məhsulon embarqo noəşe. Əmo həmonə məhsulon de Azərbaycani nomi bə Rusiya vıjoron dəvunie cəhdon be səbəbiku, Rusiya Kemruqə Xidmət Azərbaycano bə Rusiya ovaştə mivə-tərəvəzi və səşe. Həmonə vindemonədə Azərbaycani İğtisadiyyat naziri muavin Sahil Babayevi votəşe ki, çəmə respublika di təsərrufat ımruj Rusiya əhali de mivə-tərəvəzi tam təmin kardə potensial hestışe.

İğtisadşunas-ekspert Vahid Məhərrəmovi bə "Azadlıq.info" sayti votəşe ki, naziri muavini ım votəyon beəsasə qəponin. Rusiya vıjori bə mivə-tərəvəzi daxili tələbat i sorədə 36 milyon,  Az.R  iğtisadiyyati  potensial isə cəmi 2 milyon 400 həzo tone. Respublika di təsərrufat ımruj ıştə daxili tələbati təmin karde zınedəni, vey məhsulon çe xarico idxal kardedə.

Devləti rəsmi şəxsi jıqo ğeyri - ciddi qəpi bə meydon şodoe səbəbon barədə yəğin ki, hiç kəsi bey jəqo qıley sual doə nişe.