MM bə Konstitusiya zidd ğanunon ğəbul kardəşe

Az.R mustəğil devlət beku tosə ısət bı məmləkətədə 4 kərə referendum dəvuniəşone, bə çey Konstitusiya əvəz və əlavon kardəşone. Ali zumrə məmuron tərəfo devləti ım Əsas Ğanuni tələbon müntəzəm darışte, bey riayət nıkardeyən cəmiyyətədə bə adi qıley norma peqardə.

Bı rujonədə MM deputat Ğodrət Həsənğuliyevi bə "Azinform.az" sayti musahibədə Milli Məclisi ğəbul kardə antikonstitusion ğanunon barədə qəp jəşe ki, Prezident Adminstrasiyadə ım curə şanunon hozo kardedən bə Parlamenti məsləhət zınedən ki, ey ğəbul bıkon. Deputatonən bə ım Adminstrasiya məsləhəti muvafiğ, hətto ımi bə Konstitusiya tələbon zidd be zıne - zıne həmonə ğanunon ğəbul kardedən. Məsələn, şəhrvandətiku məhrum karde həxədə ğanun bə Konstitusiya zidd bıe, əmo deputaton bə çey ğəbul karde sədo doşone. Isətən "Bankon həxədə ğanun" ğəbul karde pidəşone. Çey çand ğılə maddə bə Ali Ğanuni tələbon zidde, əmo deputaton bımi məhəl nodənin. Həsənğuliyevi həmən votəşe ki, ey çand kərə MM iclasonədə, ıştə deputatə həmkaron bə konstitusiya tələbon riayət dəvət kardəşe, əmo ımi hiç qıley nəticə bə nişe.

Az.R-ədə qıley "Konstitusiya Məhkəmə" nomədə muhumə devlətə orğanən heste. Çey əsasə vəzifə məhz ğəbil bıə ğanunon bə Konstitusiya tələbon muvafiğ be səpe nəzarət kardeye. Bəs ım məhkəmə hakimon boçi ıştə vəzifə deni icra kardedənin? Ğodrət Həsənğuliyev ıştən bə ım ali nəzarətə orğani de şikayətə ərizə muraciət karde əzıni ki, əvoni pelovno, tələb bıko ki, ıştə vəzifə ğarzi bə vırə bırosnon, cəmiyyətədə ali ğanunon icra  təmin bıkon. Əmo eyən bə kom səbəb ımış kardə ni.

Əqər qıley devləti Ali Ğanundoə Orğan bə çey Əsasə Ğanuni tələbon əməl kardənibu, jəqo həmonə devlətədə hejo bənə Az.R hərcı-mərc və ıştənbəsəti bəbe.