Boku hokumət ıştə antiislam siyasəti dəvon kardedə

Boku mərkəzədə "Hacı Cavad" nomunə məçiti oçınie barədə qəpon axır ki rost beşin. Diə məkəmon ki, im məçit 1912-minə sori inşa bıə, əv bə Mədəniyyət Vəzarəti tarixi abidon siyahi daxile, devləti tərəfo muhafizə bənine, bə Dini Təşkilaton dair Devlətə Komitə ım xəbə sıftə təkzib kardəşbe, əmo apreli 12-ədə polisə dastə bə məçiti hucum kəşəşe ki, ey tey bıko, dindaron çəyo beğando.

Əvonən bımi muğavimət nişon doəşone, polisi dini fəalonədə çand kəs dəstqir kardəşe. Əmo şəhəri co məhəllə odəmonən omən məçiti ətrof əhatə kardəşone, binoşon kardə nomoj vote. Yasamal rayoni İcra Hakimiyyəti sərdarən omə de camaati molağat kardəşe. Bə ğərar omən ki, məçiti icma bə devləti rəhbəri müraciət bıko. Ail məğamədə çı ğərar bıdon, əvonən ey icra bəkarden.

Bə Dini Təşkilaton dair Devlətə Komitə sədr Mubariz Ğorbanli votəşe ki, quya ım məçiti ğeydiyyat nişe, bevəcə vəziyyətədə be qorə ey oçınie ğərar doə bıə. Mədəniyyət Vəzarəti rəsmi şəxs Vuğar Şıxməmmədovi votəşe ki, həmonə məçit hələ ponə sori  muhafizə bıəninə tarixi abidon siyahiku bekardəşone. Yəni ey həni tarixi və mədəni molyət nişe. "İslamazəri" saytən ım təşkilaton soxtəkarəti ifşa kardəşe. Çe Az.R Naziron Kabineti Muhafizə bıəninə tarixi abidon siyahi, həmən Yasamal rayoni İcra Hakimiyyəti ğeydiyyatədə dəvardə dini təşkilaton siyahi dərc kardəşe. Bə har 2 qılə siyahiədə "Haci Cavad" məçiti nom heste. Demiən hokuməti rəsmiyon çanədə duəvoj və hiyləqər be ım sayti  i kərən bə cəmiyyəti isbat kardışe. Im hadison bə nav hokuməti "Sovetski" məhəllədə "Haci Əbdurrəhim bəq" nominə ğədimə məçit şanqo de xəlvəti rıjniəşe.

"Maidə.az" sayt "Hacı Cavad" məcitədə apreli 12-ku bə 13 mənəvi etikafə şəv dəvunie həxədə xəbə doəşe. Məçiti icma bə Prezident İlham Əliyevi muracət məktub vığandəşe, xahiş kardəşe ki, çəvon ım ibadərqahi onıçınon. AİP, Azərbaycani Ruhanion Məclisi rəhbəriyyət, həmən AXCP sədr Əli Kərimli çe Boku hokuməti bə dini səpe im tojə həmlə əlağədar ıştə etiraz bəyon, həmən im hərəkət məhkum kardəşone.