Ənzəli ozodə ticariyə məntəğə və Azərbaycan Respublika miyono iğtisodiyə həmkarion.

Ənzəli ozodə məntəğə rəis iyən İronədə bıə Azərbaycan Respublika səfir bə 2 tərəfiyə ticari-iğtisodiyə həmkarion təkid kardışone.

Bə İrib raporti əsos İroni Ənzəli ozodə məntəğə rəis Rıza Məsrur de İronədə bıə Azərbaycan Respublika səfir Bonyad Huseynov mıloğat karde votışe: 2 qılə kişvər bo ticari həmkarion inkişof və şimal- cənub trenzitiyə xətti fəal kardero vey zərfiyəton xıvandin və ım sahədə de Ənzəli ozodə məntəğədə vey çokə təvafuğ iyən muzakirəon əncom bıə.

Məsrur bo ixtisosiyə nımoyeşqohon dəvoniyəro bə həmkari iyən zərfiyəton işorəş kardə və votışe: omə zəmonədə de 2 qılə kişvəri taciron və fəalə iğtisodiyə şirkəton vasitə Ənzəliədə qıləy ixtisosiyə nımoyeşqo bərpo bəbe.

Ənzəli ozodə məntəğə rəis ijən bo İron və Azərbaycan Respublika mıştərəkə har sornə kamissiya icloson dəvoniye ğəbul kardero ım məntəğə hozzo mandeku xəbəş do və təkidış kardə: bo dıyoiyə terroristiyə həmkarion xoto 2 qılə kişvəri miyono vey çokə təvafuğon əncom bıə.

Bonyad Huseynov həm Xəz dıyoədə bə Ənzəli ozodə ticariyə məntəğə əhəmmiyət işorəş kardə ijən votışe: 2 tərəfiyə ticariyə həmkarion ijən co kişvəronədə iğtisodi əloğəon, exporti və vujoron hevuj kardero ım məntəğə karde bəzne vey təsirış bıbu.

Əv ijən votışe: bo Rəşt-Ənzəli-Ostoro ğətariyə xəti komil kardero Azərbaycan Respublika karde bəzne 100 milyon dollar sərmoyə benə.