Milli Məclisi qıleyən antidemokratik ğanun ğəbul kardışe

Bı rujonədə Milli Məclisi bə "Vəkilon və vəkiləti həxədə" ğanuni, həmən bə Mulki və İnzibati Prossesual məcəllon əvəzon kardışe. Im əvəzon əsas məzmun çımədə ibarəte ki, bə Vəkilon Kolleqiya üzv nıbə huğuğşunason məhkəmə prosesonədə iştirak karde nibəznen.

Respublika Parlamenti jıqo murtəce ğəror cəmiyyətədə bə etirazi səbəb bıə. Çe "Ədalət" partiya sədr İlyas İsmayılovi bə "Yeniçağ.az" sayti votəşe ki, çanədə vəkilon ki, bə Vəkilon Kolleqiya üzv nin, çimi bəpeştə məhkəmonədə vəkiləti karde huğuğ əbınişone. Im səhv qıley qəme. Deputat Çinqiz Ğənizadə, Zahid Oruciən ım ğərar tənğid kardəşone, votəşone ki, Azərbaycanədə vəkilon miğdar çe Ermənistan və Qurcistanisən kame. İsət çəvonədə xeyli hissə çe məhkəmə prosesonku bə kəno noe bə problemon səbəb bəbe. 

Bə vəkilon həxədə ğanuni ım əvəzon barədə təklif çe Ali Məhkəmə sədri tərəfo daxil bıə. Məğsəd məhkəmədə azad vəkilon iştiraki vəy se, əvoni de hokuməti nəzarətədə bıə vəkilon əvəz kardeye.

Məhkəmonədə şəhrıvandon huğuğon mudafiə kardə huğuğşunason bə MM ım ğərarı de siyasi aksiyon dəvunie roy etiraz bəkarden. Bənə 1-minə qəmi əvon Boku şəhərədə mitinğ dəbəvunen. Praktik Huğuğşunason Orupi niyabrə manqi 3-ədə jıqo qıley ğəror doəşe. Im qrupi uzv vəkil Xalid Bağırovi votəşe ki, be ım ğanuniən məhkəmon bə əhali huğuğon darıştə hokumon rəvoc dodəbin. Im ğanun şəhrıvandon huğuğon mudafiə karde poədə bə ciddi problemon səbəb bəbe.