Ğasımi: Fələstin detosə kamilən ozod bey çı islam dınyo i minə mıvzoe.

İroni xarıci vəzarətxanə sıxənəvot təkidış kardə: çı dışmenon həmmə məkrinə planon jentonədə əmmo Fələstin hejo detosə kamilən ozod bey ruji çı islam dınyo i minə mıvzo bəmande.

İroni xarıci vəzarətxanə sıxənəvot Bəhram Ğasımi ımruj təsdiğış kardə: vey insoni təəsufi bois bıdə ki bəzi islami kişvəron dəvardə 70 sori mıddətdə bıə islam dınyo coni vey yolə kanə zəxmi bənə ğeyri əsliyə mıvzo hisob kardən ijən jıqo bənə beməxon hətto çı dınyo vey sadə mıvzoon dərk kardeku ociz bıbun.

İroni xarıci vəzarətxanə sıxənəvot ijən votışe: hiç şəxs, kişvər və ya xot mıvzo karde nibəzne islamiyə umməti umum fikon iyən nəzə çı Fələstin muhimmə mıvzoku mınhərif bıku boçi ki Fələstin çı islam dınyo cıvoni i baxşe.

Ğeyd kəmon zinə çı Bəhreyni xarıci vəzir Xaled bin Əhməd Ali Xəlifə bə Amerkə və siyonist rejim xidmət kardero Ğudsi çı islam dınyo ğeyri əsliyə mıvzo zınəş be və iyən iddiyoş kardə ki Fələstini barde de Amerkə kəllə bə kəllə noe hiç foydəş ni.

Tojədən iyən zinə şəvi faxti i bıə milləton təşkilati umumiyə icmadə bə Fələstin himoyə kardero qıləy ğətnomə de 128 qılə mısbət, 9 qılə mənfi iyən 35 qılə be tərəfə sədo vasitə təsdiğ be.

Bə həminə ğətnomə əsos Ğuds hejo çı Fələstini paytəxt bə mande.

Amerkə prezidenti tojə ğəroli ijən Ğudsi bənə çı siyonist rejimi paytəxt elan karde məhkum kardero de Tırkiyə tələbi bərobər İslamiyə Həmkari Təşkilati fovğəlodə iclos Dekabri 12 iyən 13 minə ruji İstanbulədə bərpo be.

Bə sıpiyə bino elani əsos Amerika prezident Donald Tramp ıştə ğəroli siyonist pesoxtə bıə rejimi paytəxti telavivi əvəzi Gudsədə ğeyd karde barədə elanış kardə əmo çəy icra karde bo 6 manqi bə təxir eğandə.