Qeneral mayor Cəfəri: İronədə tojə fitnə məğlub be.

Qeneral mayor Cəfəri İronədə tojə fitnə cərəyoni məğlubiyəti elan karde bəpeştə votışe: İroni oğo və bəsirət xıvand bıə millət ıştə roşon çı biqanə və xarıciyə amilon iyən iğtişoş əkəyonku co kardışone ta islamiyə nizomədə co qılə fitnə həm məğlub bıbu.

İroni Sepah təşkilati fərmondə de İrib mısohibə cərəyonədə votışe: fitnəkoron iyən çəvon peştədə bıə istikbar İroni tojə iğtişoşonədə cəmaəti həlok karde bəpeştə İroni dıvləti mıttəhəm karde pidəşon bən əmmo de əmniyyəti ğıvvon huşin mande və milləti bəsirət çı deşməni co qılə fitnəon həm məğlub be.

Qeneral mayor cəfəri əlovəş kardə: çı fitnə mərkəzədə bıə iğtişoşçion qırd İroni inğilabi deşmən iyən mınofeğin terroristiyə qrupi tono təlim vinde bıən ki zınə bəpeştə dəstqir bən.

Qeneral mayor Cəfəri bə Amerkə, Ğərb və siyonist rejimi iddiyaon de İroni millət dustiyəti və həmroəti işorə iyən təsdiğış kardə: de fitnəkoron bə icod mande sabitış kardə ki duəvujin çı İroni milləti dust nin boçi ki əqə əvon çı İroni milləti pidəşon bıbu hiç faxt İroni məzlumə milləti bə sanksiya nibənon.

İroni Sepah təşkilati fərmondə bə ım nuktə işorəş kardə ki deşmən ıştən çok zıneydə hərbi cəhətiku İroni təhdid karde əzı ni votışe: İroni inğilabi bəpeştə deşmən ıştə həmmə sərmoyəonku iştimai, mədəni, iğtisodi və əmniyyəti sahəonədə istifodəş kardə ta İroni təhdid və məğlub bıkə əmmo həmmə baxşonədə ya məğlub be və ya xot taleədə yəğin məğlub bəbe.

Ğeyd kəmon ki İroni millət zinə və ımruj çı İroni muxtəlif şəhronədə yolə etıroz aksiyaon bərpoşon kardən ta de əzəmətinə huzuri ıştə nifrət və əsəboniyəti çı deşmənon mıdoxiləon iyən iğtişoşçiyonku nışo bıdən.

Dəvarde haftə 5 şambə rujiku İroni bəzi şəhronədə cəmaət de aksiyaon bəzi puliyə muəssisəon vəziyəti mıəyyən nıbey, ərzağon boho bey ijən dıvləti nəzorəti zəifəti xoto etırozon bino kardən ki bəzi fitnəkoron sue-istifodə karde zəminəon bois be.

Amerkə və siyonist rejimi rəsmi şəxson ijən xarıciyə mediyaon ım vəziyətiku istifodə karde sayədə iğtisodi etıroz aksiyaon bə siyasi iğtişoşon tərəf bardən.

Çımiku bə nav, 2009 sorədə həm İronədə prezidenti səçıni nooromtətion bəpeştə Amerkə, İnqeltra və vabəstə bıə onsoron ıştə həmmə imkanaton vasitə bə İroni islamiyə nizomi zərbə varid karde fikədə bıən ki İroni millət çəvon fitnəon xonsa kardən.