İronədə tojə fitnəon məğlubiyəti bəpeştə, İroni ərtış fərmondə mesaj.

Tojə fitnə məhv kardero İroni ərtış fərmondə çı İroni milləti huzur və huşin mande, intizami zumand və səbr əkə ğıvvon iyən idiyoşon nıbıə bəsicion səy və cəhdonku ğədrdonətiş kardə.

Qeneral mayor Seyed Əbdul Rəhim Musəvi ım peyğomədə ğeydış kardə: yolə şəyton və siyonist rejim ıştə mızdoron və mınofeğin cinoyətkoron bə meydon vığandeşone ijən jəqo xiyol kardən ki meydon teyliye ta de bəzi zəifətionku sue-istifodə kard İronədə stajış nıbıə əmniyyəti xərob bıkən.

Im peyğomədə ğeyd be: de İroni milləti huşinə huzur və intizamiyə ğıvvon zumandə reaksiya deşmənon məğlub bıən ta ijən bo fərib hardə kəsonro siyoə dim, bo sultə nizomiro co qılə məğlubiyət iyən bo İroni islamiyə nizomiro co qılə ğızılinə karnamə bə vıcud biyə.

Dəvarde haftə 5 şambə rujiku İroni bəzi şəhronədə cəmaət de aksiyaon bəzi puliyə muəssisəon vəziyəti mıəyyən nıbey, ərzağon boho bey ijən dıvləti nəzorəti zəifəti xoto etırozon bino kardən ki bəzi fitnəkoron sue-istifodə karde zəminəon bois be.

Amerkə və siyonist rejimi rəsmi şəxson ijən xarıciyə mediyaon ım vəziyətiku istifodə karde sayədə iğtisodi etıroz aksiyaon bə siyasi iğtişoşon tərəf bardən.

Çımiku bə nav, 2009 sorədə həm İronədə prezidenti səçıni nooromtətion bəpeştə Amerkə, İnqeltra və vabəstə bıə onsoron ıştə həmmə imkanaton vasitə bə İroni islamiyə nizomi zərbə varid karde fikədə bıən ki İroni millət çəvon fitnəon xonsa kardən.