De Xanım Həzrəte Fatimə Zəhra(s) şəhodətə ruji mınosibəti səbəsəloməti.
Imruj Hicri Ğəməri Cəmadiul Sani manqi 3 iyən Fevrali 20-nə ruje, bə təğvimi əsos ımruj de Xıdo Rəsul(s) qiramiyə kinə iyən dınyo şiəyon 1-nə İmom Həzrəte Əli(ə) qiramiyə həyot həmro şəhodəti sorqərdışi bərobəre.
Həzrəte Fatimə Zəhra(s) Beesəti 5-nə sori Cəmadius Sani 20 ədə Məkkəədə bə dınyo omə.
Ə Həzrət Hırdənəti faxtiku ıştə qiramiyə dədə Həzrəte Muhəmməd(s) hidoyəton jentonədə de İlahi məərifon oşno be, ijən ıştən çı Xıdo dərqah məxsusə bandəon və İlahi elmon sərçəşmə be.
Həzrəte Fatimə Zəhra(s) jimoni həmmə ləhzəonədə isor, səbr, qızəşt, qinaət, səxavət, Xıdo ibadət iyən bə fəğıron komək kardeku nımonə və misdağonış de aliyə sima və obrazi nışoşon do ijən vey yolə tarix soxtə şəxsiyətoni bənə İmom Həsən(ə) iyən İmom Huseyn(ə)-i tərbiyə və pırosnişone.
Oxo ə Həzrət 18 sor jimon bəpeşt çandə zəmonə hakimon zılm və sitəm iyən ıştə qiramiyə dədə İslom dini peyğumbər(s) bəfoti dard-ğəmi xoto bə bəzi rəvayəton əsos Hicri Ğəməri 11-nə sorədə bə şəhodət rəsə.
De Həminə matəmə əyyami mınosibəti çı Əhli-beyt(ə)-i aşiğon Məşhədədə bıə şiəyon 8-nə İmom Həzrəte Rıza(ə) iyən Ğomədə bıə Xanım Məsumə(s) pokə hərəmon iyən co vırəonədə bıə məçidon Huseyniyəonədə zinə şəviku əzodorəti mərasimon binoşon kardən.
İroni Rəşt şəhri Tolışi Rədio tərəfiku çı Xanım Həzrəte Fatimə Zəhra(s) şəhodəti sorqardışi bəşımə səbəsəlomətəti ərz kardedəmon.
