İronədə ımruj ərtış milliyə ruj; Tehroni məxsusə mərasimədə İroni prezidenti sıxənon.

Imruj Fərvərdinə manqi 29 iyən Aprelə manqi 18 və de ərtış milliyə ruji bərobəre.

İronədə ımrujnə ruji bənə ərtış milliyə ruji ğeyd karde çı İroni inğilabi təsis əkə mərhum İmom Xomeyni(r) tədbironku be. Əv həm qıləy şərayetdə ki daxil və xaricədə bə İroni ərtışi əleyh çandə deşmənçiyə planon cərəyondə be.

İronədə ərtış çı İroni hərbi və mudafiə ğudrətədə muhimmə rolış heste ijən vey meydononədə bə İroni milli mənafe bəfodo mandə.

Imruj həmzəman de İroni muxtəlifə şəhron Tehronədə həm məxsusə mərasimon əcumlə hərbion parad iyən hərbi tojə təchizaton nışo doe çı İroni prezident Həsən Ruhani tono bərpo be.

İroni prezident çı Tehroni məxsusə mərasimədə votışe: xarıci zumandə kişvəron beynəl xalğ ğanuni əks məntəğə koonədə mudaxilə kardən iyən İ Biə Milləton təşkilati ğanuni əks ıştən bə sə bə kişvəron təcavoz kardən.

Həsən Ruhani bə İroni ətrof iyən Asiya ğərb məntəğədə təcavozkarə kişvəron lonə karde iyən ğeyri ğanuni huzur işorəş kardə və votışe: jıqonə məntəğə və şərayetdə yolə ğudrəton terrorçiyə qruponku bənə əbzar istifodə kardən.

İroni prezident İroni ərtış ğıvvonış çı İroni ərazi təmamiyyəti muhafizə əkə və İroni nizom iyən istiğloli qarantiya əkə hisob iyən təsdiğış kardə: İron bə ğudrət və siloh ehtiyocış heste ta yolə kişvəron vədə muğavimət bıkə ijən İronədə bə terroriston fəaliyət və huzur icozə nıdoy.

Ruhani bə İroni siyasət məntəğədə bə hamsuyə kişvəron ehtıromkarde işorəş kardə və votışe: məntəğə kişvəron çı yolə kişvəron və ya xot ğeyri ğanuni rejimonku ğudrət iyən əmniyyəti heriyə fikədən məbon.

Ruhani ijən bə İroni həx harcurnə silohon soxtəro işorəş kardə və xəbə dortiş do: yolə kişvəron hejo bə məntəğə siloh həvote fikədə nıbon iyən bənə tacir məntəğədə rəftoronkon ijən ıştə siloh fabrikaon məntəğədə hevuj karde xiyoliku bə kəno be mandon.

İroni prezident bə İroni silohinə ğıvvon rol məntəğədə stabilə vəziyəti icod karde işorəş kardə iyən votışe: İron ıştə ğanuni ğudrəti sayədə bə məntəğə sulhin sədo və tələbi cəvob dodə boçi ki İron anədə yolə sərzəmin və milləti xıvande ki bə co kişvəron işğal karde fik ni bəkay.

Imruj həmçınin de ırtış milliyə ruji həmzəman və Tehroni yolə paradədə "Kəmin" nomo bıə rəkıtiyə sistem iyən "Mirsad" mudafiə əkə kompleksi tojə və mudernə versiya əməliyoti bıə iyən imtovon be.

Zulfəğar tank, Bəhmən rəkıtiyə sistem və Sədad Arsenal və top həm ımruj çı tojə nımonəonku təğdimat mərasimədə nışo doe bıə.