İstanbuli iclosədə İroni prezidenti nıtğ.

İstanbuli şəhrədə bıə islami həmkari təşkilati çəş nıkardə iclosədə İroni prezident de 6 qılə əməliyə təklif həmmə mısılmonon iyən islami dıvlətonku dəvətış kardə ki vəhdəti sayədə Fələstin sərzəminədə çı Sionist rejimi işğali bə oxo rəsə zəminə hozzo bekən.

Həsən Ruhani zinə şəv çı islamiyə həmkari liqa iclosədə təklifış doe ki İ Bıə Milləton Təşkilatiku tələb bıbu Amerkə səfarətxanə ğeyri ğanuni bə Ğuds ovıştoniyə iyən Fələstinədə sionist rejimi tojə cinoyəton barədə qıləy iclosi bərpo bekə.

Ruhani ijən Telaviviku çı Amerkə səfarətxanə bə Ğuds ovıştoniyə barədə dəğiğə təhğiğ və təğibonro iyən Amerkə və sionist rejimi vəy qətero beynəl xalğ, məntəğə və milli soyədə siyasi, iğtisodi iyən ticari tədbiron dəvoniyəro islami həmkari liqaədə uzv bıə kişvəronku qıləy xususi kamissiya təşkil doe tələb kardə.

İroni prezident kalektiv sorətdə bə Fələstin məzlumə milləti homanitarə koməkon vığande təkid kardə ijən ımsornə sori ruj manqi oxonə cumə ruji bənə Ğuds beynəl xalğiyə ruj ğeyd karde islamiyə kişvəron təğvimədə bə yod vardə.

Ruhani ıştə təklifon dəvomədə əlovəş kardə: sionist rejimi ətomiyə mərkəzon Asiya ğərb və dınyoədə vey yolə ciddiyə xətər və təhdid hisob kardə ki vey kərə İroni tərəfiku xəbə dorti doe bəy ki bəbe islamiyə umməti periri vert bıbu.

Əv eyni holədə sionist rejimi siyasətonış Fələstin sərzəmini işğali iyən Fələstinıjon həx-huğuği poymal karde çı islam dınyo vey yolə təhdid zınəş be və əlovəş kardə: sionist rejim de həmmə ərjon təhğir karde, umum iştimaiyəti bə canqi tərəf dəvət kardedə.

İroni prezident, Telaviviku çı Amerkə səfarətxanə bə Ğuds ovıştoniyə iyən işğaliyə sərzəminonədə Fələstinıjon ğətliami məhkum kardə və əlovəş kardə: Amerkə deştə ım siyasəti bo Fələstinıjon ğətliam kardero bə sionist rejim icozə dodə.