İron və İsveçrə prezidenton bə ətomiyə sazışi oqəte və idomə təkid kardeşone.

İron və İsveçrə prezidenton bə ətomiyə sazışi oqəte bənə qıləy siyasiy yolə nəticə onvani təkid və ım təvafuği dəvomi bo dınyo əmniyyət və sulhi nəf hisob kardeşone.

İroni prezident Həsən Ruhani zinə əsr Bernədə de İsveçrə prezident Alen Berse bə ico dəvoniyə bıə xəbəiyə iclosədə, 2 tərəfiyə sohbətonədə bıə muhimmə mətləbon, İroni ətomiyə sazış ijən həmmə kişvəron bə beynəl xalğiyə təvafuğon və Əmniyyət Şura ğətnomə(məxsusən 2231 ğətnomə) ehtırom karde elan iyən əlovəş karde: ta zəmoni ki İroni mənafe ətomiyə sazışiədə təmin və ım zəminədə lozimə təzminot sə bıbu, İron ətomiyə sazışiədə bəmande.
İroni prezident ım iclosədə ki elmi, səhihiyə və iğtisodi 3 qılə həmkari sənədon imzo karde bəpeştə bərpo be, umidəvo be: 2 qılə kişvəri moli, banki, ticari və sərmoyə noe, turizm, elmi və mədəniyət rabitəon bə inkişof bırəsi.
Ruhani bə İroni zidd bıə Amerkə rəsmi şəxson tojə sıxənon befoydə zınəş be iyən təkidış karde: ım xiyol ki sıvoy İron həmmə kişvəron nat ixroc bıkon səhv və beməxə sıxane.
İsveçrə prezident həm ım iclosədə de işorə bə 2 qılə kişvəri rabitəon hevujətiro iğtisodi, moli, elmi və texniki və mıhocirət sahəonədə plan soxtey votışe: de İroni prezident vindemoni cərəyonədə 2 qılə kişvəri dıl piyə çiyon məxsusən ətomiyə sazış və ım təvafuğiku Amerkə xarıc bey nəticəon barədə muzakirə be.
Alen Berse de təkid bə ım ki İsveçrə bə ətomiyə sazışi icra karde mıttəhıd və pobande təkidış karde: ətomiyə təvafuğ çand qılə kişvəron tərəfo imzo bey bəpeşt İ Bıə Milləton Təşkilati Əmniyyət Şura 2231 ğətnomə çəy qarantiya əkəy çən bo ım təvafuği oqətə və idomə peydo karde 2 tərəfiyə həmkarion xəyli muhime.
İsveçrə prezident ijən de İroni bə moli və iğtisodiyə rabitəon çimiku vey zumand karde təkidış kardə.