Ğasımi: İroni rəket bərnoməku NATO niqəronəti əsosış ni.

İroni xarıci vəzarətxanə sıxənəvot NATOədə uzv bıə kişvəron yolon tojə iclosi bəyoniyə reaksiyaədə votışe, yəğin İroni rəket doktorini barədə çı NATO beəsosə niqəronəti, çı İron İslam Respublika siyasəton ım sahədə ğabeliyətiku mıhofizə karde, zumandəti iyən rəketon ğudrəti ziyod karde hıç təəsirış nibəbe.

Çoşambə ruji iclosədə Şimaliyə Atlantik Peymon Təşkilat(NATO)-i Uzvə Kişvəron Yolon ıştə bəyoniyədə, İroni məntəğəiyə fəaliyəton və rəket bərnomə barədə ıştə niqəronəti nışoşon do.

İroni xarıcə vəzarətxanə sıxənəvot Bəhram Ğasımi zinə ruji əlovəş karde, NATOədə uzvə kişvəron ki ətom sazışi icra karde iyən İroni pobəndəti və cəhdon barədə Ətom Enerji Beynəl Xalğiyə Təşkilati dəvominə raportonku, kamelən oqohin, çı Amerkə rəsmi şəxson rozi karde əvəzi bəpe ıştə uzvonku qıləyni, muxtəlifə sahəonədə bə beynəl xalğiyə mığoviləon əcumlə ətomiyə sazışi əməl nıkarde rəftoriku niqəron bıbon.

İroni xarıci vəzarətxanə sıxənəvot təsdiğış karde: İroni İslami Respublika rəket bərnomə nə ın ki 2231 ğətnomə ləğvış kardə ni, bəlkəm kamelən mıdufiə əkə və məlume ijən İron həm bənə həmmə dınyo mıstəğilə kişvəron, hərbi-mudafiə sahədə adi bərnoməonku ıştə mənafe, milləti əmniyət və kişvəriku mudafiə istifodə kardero həx-huğuği xıvande.

Ğasımi məntəğədə İron İslami Respublika roli barədə həm votışe: İron həmişə deştə həmsoyəon həmkari və məntəğəiyə sohbəton tələbış kardə və bə ım sohbəton varid beyro harcornə fırsətiku istifodə bəkarde.

Əv oxoysə əlovəş ka: İron İslam Respublika, çəyku bənav ki kali NATOədə uzvə kişvəron de terrorist mubarizə bardeyro be nəticə və nımoyışiyə koalisiyaon bərpo bıkon, əv həm qıle holədə ki terroristonku kalion Avropa kişvəronku bə Miyonə Şərğ varid bıə bən, dıştə dərrokə, fame iyən beəmonə cəhdi de tərbiyə bıə ixrocotiyə terroriston mubarizəon binoş karde ijən oxoysə məntəğədə əcumlə DAEŞ terroristiyə xətərnokə qrupi sərzəmini cəhəto hakımiyəti məhv kardero ıştə əsərin roli ifoş kardə.