De Həzrəte imom Əliyən-Nəğı(ə)-i milad ruji sorəqardışi mınosibəti təbrik.

Imruj Hicri Ğəməri Zil-Hiccə manqi 15, Miladi Avqustə manqi 6 de Şiəyon 10-nə İmom, Həzrəte Hadi(ə)-i milad ruji sorəqardışi bərobəre.

İmom Əliyən-Nəğı(ə) Hicri Ğəməri 212-nə sori Mədinə şəhri ətrofədə bə dınyo omə və ıştə əzizə dədə, şiəyon 9-nə İmom, Həzrəte Cəvad(ə)-i şəhodəti bəpeştə mısılmonon rəhbəriyəti bəştə qiş ğəte.

Çı İmom Əliyən-Nəğı(ə)-i məşhurə ləğəbonku "Hadi" yəni hidoyət əkə ğeyd bıə.

İmom Hadi(Ə) ıştə bərəkətinə jimonədə həğiğiyə islami sima və obrəzi elan karde xoto veyə cəhdış karde, çumçiku bo əğidəvi, fiki iyən ictimaiyəti muxtəlif məsəlon barədə soval və şubhəon cəvob doe xoto veyə icloson bərpoş karde ki həmonə əsri elm və zıne sohibon diğğət iyən çı Həzrəti təlimon hevujə dıyoku istifodə karde bois bıə.

İmom Əliyən-Nəğı(ə) çı insoni, əxloği və fəzilət xusyətonədə kəmoli həddədə be.

Ə Həzrət ıştə əsrədə vey əla, imonin, səbr əkə iyən mıhtərəmə odəmonku be və bə oşko iyən bəloğətinə sıxan həmçınin kərimə əxloğon xıvandəti məşhur be.

Bə həminə mınosibəti xoto İroni mısılmonə millət zinə şəviku muxtəlif şəhronədə bıə mığəddəsə vırəon, məçidon iyən xiyobononədə məxsusə şoə mərasimon bəpo kardəşone ki ımruj həm dəvom kardedə.

İron İslam Respublika Tolışi Rədio tərəfo çı Xıdo Rəsul(s) pokə nəvəonku qıləyni, İmom Əliyən-Nəğı(ə) moəku bıə ruji sorəqardışi bə şımə muxatəbon, həmmə mısılmonon və dınyoədə ozodi tələbəkəyon təbrik ərz kardedəmon.

Samiraədə Həzrət Hadi(ə)-i hərəmi ziyorət karde bəşmə ğısmət bıbu.