Zərif: İron təhdidi tov varde əzı ni.
İroni xarıci vəzir Niyoyorkədə votışe: İron hiç faxt təhdidon tov varde əzı ni.
Bə İrib raporti əsos muhəmməd Cəvad Zərif bə İroni inğilabi və tarixi mıddətədə çandə bıə iğtisodi və siyosi fişaron işorəş karde və votışe: İron fişaron və təziğon vədə muğavimətış karde əmmo hiç faxt təhdidon tov varde əzı ni və bə deşmənon tərəfiku icod bıə təhdidon mənfiə reaksiya nışoş doe.
Zərif de Vaşenqton muzakirə karde imkoni rəddış karde və votışe: Amerkə bo muzakirə karde qıləy xatir cəm və etimodinə kişvər ni.
Əv bə ətomiyə sazışiku Amerkə xaric bey işorəş karde və ijən votışe: har kərə de Amerkə muzakirə karde prossesi ijən bino karde əzı nimon.
İroni xarıci vəzir çımiku bə nav həm Niyoyorkədə bə beynəl xalğiyə muğaviləon əməl karde çı beynəl xalğiyə rabitəon şərt elanış kardə be ki Amekə tərəfiku həm bəpe əncom bıbu.
Muhəmməd Cəvad Zərif de BBC kanali mısohibədə bə Amerkə tərəfo ədaştə bıə təklifon ijən de İron muzakirə karde işorə və təkidış ka: de diğğət bə ətomiyə sazişədə çandə noə bıə vağt və cəhdon bəpe Tramp bo votımon ki ım sazışiku vey çok muğavilə peydoy bəbe.
Əv bə İnqiltərə dıvləti vindemon həm işorə və təsdiğış kardə: Avropa bəpe ıştə siyosi vindemon və himoyəon bə elmiyə prosses və hərəkət əvəz bıkə.
Muhəmməd Cəvad Zərif əlovəş karde: ətomiyə sazışi barədə Tehron çı Avropa əməliyə koon çəş kardedə əmmo əvon bəpe oğo bıbun ki İroni səbr və çəş karde vaxt sə bəbe.
Amerkə prezident Donad Tramp, Mayə manqi 8 ətomiyə sazışiku Vaşenqtoni xarıc bey və ətomiyə sanksiyaon oqordıniye elanış kardə(sanksiyaon i minə dıvrə Avqustə manqi 7 icra be iyən 2 minə baxş ğərore ki Noyabri 4 rəsmən icra bıbu).
Trampi Im hərəkət de dınyo zumandə tənğidon məxsusən ətomiyə sazışi co tərəfon əcumlə Fransə, İnqiltərə, Russiyə, Çin, Almaniya və Avropa ittifoğiku dim bə dim be ijən əvon izhor kardən ki beynəl xalğiyə ətomiyə sazışiku ijən himoyədorəti bəkan.
Çumçiku, İron və Avropa bə çəy xoto ki ətomiyə sazış ijən oqətə bıbu, ıştə sohbəton bino kardəşone.
Avropa, ım muzakirəon cərəyonədə mıttəhid be ki bə İroni əleyh bıə Amerkə sanksiyaon mığubilədə himoyə əkə təklifon, əv həm ətomiyə sazışi çərçivədə elan bıkə.
İron İslam Respublika təkidış kərdə ki Avropa tərəfiku edaştə bıə təklifon bəpe ətomiyə sazışiədə bıə İroni milləti həx- uğuği zomin bıbu iyən qarantyə bıkə.
