Qeneral Səlami: məntəğədə Amerkə hıkmronəti məhv bəy. 

İroni sepah təşkilati fərmondə caneşin qeneral mayor Husein Səlami mığoviməti çı dışmenon vədə səbarzəti ser zınəş be və votışe: de İroni islamiyə inğilabi bərəkət məntəğədə Amerkə siyasi ğudrət iyən hıkmronəti məhv bəy. 

Bə İrna raporti əsos əvotışe: İron çı deşmənon həmmə planon vədə mandəy və çı Amerkə terror, sanksiya iyən təhdid planon məğlubış karde; ısət Amerkə çok zınəydə ki mığovimət cəhbə səbarzətion sayədə qrupon və ğudrəton Amerkə vədə muxalif karde zu xıvand bıən. 

İroni sepah təşkilati fərmondə caneşin bə məntəğədə terroristiyə fəaliyəton iyən Amerkə tərəfo bənə DAEŞ qrupi icod karde siyasəton işorəş karde iyən təkidış ka: de stratejik səhvi vositə Suriyə, İrağ və Yəmənədə qıləy əzəmətinə muğavimət cəhbə icod bıə ki sionist rejimi çəşiku hanış barde; əvon 7 teriliyon dollar bo DAEŞ-i icod karde xərc kardeşone əmmo çı nəticə və səbarzəti bə İron və mığovimət xeyr be. 

Qeneral Səlami əlovəş karde: Amerkə mədəniyət nışo dodə ki muzakirə sazışi oxo de Amerkə canq iyən təcavuzi bə i vırəy. 

Tojədən çı Amerkə hərbi xətər və təhdidon barədə həm İroni silohinə ğıvvon ali sıxənəvot qeneral Şekarçi votışe: əqə Amerkə və çəy həmpeymonon xətoə hərəkəti əncom bıdən İron anədə zumandə silli bə əvon bəjne ki həmişə pəşimon bıbun.