İnğilabi Yolə Rəhbər: İslamiyə İroni məşhurə dışmenon, siyasi və əxloği fəsodədə ğərğin.

İslamiyə İnğilabi Yolə Rəhbər kali muğəddəsə mudafiə, hərəmiku mudafiə və kişvəri əmniyyət iyən marzonku mudafiə əkə şəhidon ailəon vindemonədə, təsdiğışon karde: İslamiyə İroni məşhurə dışmenon, siyasi və əxloği fəsodədə ğərğin, əqə Amerkə dəğiğ zıney pidəron bu bə Amerkə rəsmi şəxson iyən prezidenti nəzə kənən.

Həzrəte Ayətullah Xamenei zinə sıb ım vindemonədə əlovəşon karde: Amerkə rəsmi şəxson bıvindən, təməkorəti, həxon dəqordıniye və bə insonon con və moli beittino bey bıvidən. Yəmən qıləy nımunə iyən misdağe, Səudion cənoyət kardən əmmo ım cinoyətonədə Amerkə şərik heste. Iştən həm etırofış karde. Noxəşxonə, vıjor və cəmaəti cəm bıə vırəon bombardımon kardən, ımon qırd cinoyətkorin, ım çı Amerkə simo iyən obraze.

Ə həzrət de işorə bə Amekə dəvardə 2 sori mıddətədə əncom doə cəhd və hərəkəton məxsusən həmmə tərəfinə sanksiyaon iyən bə İroni muxtəlifə dışmenon komək karde, çəvon planon ifşo bey zınəş be və təkidışon karde: çəvon hədəf ım be ki de sanksiya və anti əmniyyəti hərəkəton əbzari kişvərədə 2 dastəti, ixtilof və qrupon miyono canqi icod bıkən peşo qıləy cəmyəti bə xiyabonon ome təhrik bıkən, çı ım plani nomi "doğə tovıston" noə bıən, əmmo de dışmenon çəşi ku bey ımsornə tovıston veyi çokə tovıston be.

İslamiyə İnğilabi Yolə Rəhbər ijən de işorə bə Amerkə rəsmi şəxson sıxan ki voteydən İron ıştə inğilobi 40 sorəti nibəvinde, votışone: İroni milləti de komilə mığovimət bəmande iyən de Xıdo koməki Bəhmənə manqi 22 ədə İslamiyə İnğilabi 40 minə sorqardışi dəvardə soron mığoisə de veyə əzəməti bərpo bəkarde.

Həzrəte Ayətullah Xamenei, sioniston və məntəğə mırtəceonış çı İroni milləti dışmen və suie-ğəsdonədə Amerkə şərik zınəş be və təkidışon karde: həlbətə əmə çəvon sə vey zumandimon çımçiku detosə ısət İslamiyə Respublika vədə hiç ğələti əncom doəşon ni iyən çimi bəpeştə həm əncom doe karde əzı nin.

İslamiyə İnğilabi Yolə Rəhbər de təkid bə ım ki İroni millət bəpe de kamilə bəsirət, vəzyəti dəğiğ manitorinq bıkə iyən ıştə mıvğiyəti zumand bıqəto əlovəşon do: ımruj ım tufaniyə dınyoədə ki çı tufan bə Avropa və Fransə həm rəsə, İroni millət de islam bərəkəti çı Əhli Beyti(ə) mıhəbbətinə əmnə qəmiədə ğərorış qətə və ğələbə bə ım millət bərəse.