İnğilabi yolə rəhbər:İron və Ermənistan bəpe zumand və bıvə əlağonışon bıbo.

İslami inğilabi yolə rəhbəri İron və Ermənistanı ixtisadiyə həmkarətion inkişaf doe zərurətiku işarəş karde və votışe: amerkəvıjon tələbiku kəno Tehron və İrəvanı əlağon bəpe uman ,dəvomin iyən bə dustiyəti əsos bıbo.

İslami inğilabi yolə rəhbər Həzrət ayətullah Xamenei zinə Ermənistanı 1 minnə vəzir Nikol Paşiniyanı vindımonədə bə ironıjon ve çokə əlağə dıştə erməniyə həmvətənon işarəş karde iyən mığəddəsə mudafiyə devrədə çəvon fədakarətionku votışe və əlavəş ka az tehronədə bə ım şəhidon kə şim,çunki əmə bə ironi zid təşkil bə canqədə erməniyə şəhidon bənə mıslmonə şəhidon ironi fəxronku zındəmon.

Həzrət Ayətullah Xamenei ruj bə ruj veyə dustiyəti və həmkarətiş, vəzifə iyən İron və Ermənistanı mıştərəkə faydon cəhətdə zınəşe və əlavəş karde əlbətə bə Amerkəvıjon heç qılə bovə ni və həmə vırəndə fitnə,fəsot,ixtilaf və canqi domoədə hestin və de İron və ermənistanı əlağon iyən milləton faydonədə həm muxalifin əmmo əmə çımon vədə vəzifəmon heste ıştə həmkarətion və əlağon zumand bıkəmon.

İslami inğilabi yolə rəhbəri əlavəş karde İron və Ermənistan heç vaxti deyandı problemışon bə ni və əmə bə islami təlimaton əsosi de hamsoyan çok rəftor kardeyu ıştəni vəzifədo zınvəmon və əlbətə amerkəvıjon rəsmi şəxson məsələn Can Bolton  jıqo məsəlonku iyən insoniyə əlağonku heç qılə famış ni.

Həzrət Ayətullah Xamenei İron və Ermənistanı ixtisadiyə həmkarətion səthış 2 qılə məmləkəti zərfiyətonku ve kamış zınə və əlavəş karde ım səfərədə bə dast omə roziyətion bəpe ciddiyə sorətədə bə nəticə bırəson.

İslami inğilabi yolə rəhbər eyne holədə Ğərəbaği məsələ həllış bə Ermənistan və Azərbaycan Respublika məğamon muzakiron dəvom anqılış zınə və ım problem həlliyu bə İroni hozzı mande işarəş karde.

Nikol Paşiniyan həm ım vindımonədə bə Tehron təşkil doə səfərədə votımonon və sazışonış mısbət və bə omidvarəti bois bə hərəkətış zınə və votışe: Ermənistan heç vaxti bə ironi zid hərəkətonədə  iştirakış bə ni və çimi bəpeşt həm iştirak nibəkay.

Paşiniyan ironədə bıə erməniyə ictimaiyəti çokə jimoniku ıştə şoətiş elan karde iyən çı məsələku təşəkkurış ka və votışe: yəğinım heste de şımə çokə təcrubə iyən məntəğədə İron İslam Respublika muhimmə rol 2 qılə məmləkəti həmkarətion nakonəsə ve inkişaf bıkə.