Ərdəbilədə de Az.R dini məhbuson həmrayəti tədbir dəvardə.

Ərdəbili İmomzodə Sədrəddin turbədə de Az.R dini məhbuson həmrayə mərasim dəvardə. Im məclisi xətib hoccətul-islam Əzizi votəşe ki, 2015-minə sori noyabri 26-ədə Nardaran ğəsəbədə vağeə bıə hadisə həmə mominə odəmon, alim və mərcəye təğlidon bə ğussəş dəğande.

İmom Huseyn (ə) Ərbəini rujonədə Az.R polisə ğıvvon de əzadarəti məşğul bıə odəmon səpe həmlə kardışone. De  dindaron jıqo rəftor həğiəğtən həvəşiəti, bo har qıley devləti rısvoə hərəkət bıe. Həkimə Xatuni ğəbi mevcud bıə qıley muğəddəsə məntəğədə 4 nəfər dindar şəhid, çand nəfər zəxmin bıe, xeyli odəmən bə zindon dənoşone.

Hoccətul-islam Əzizi həmən ğeyd kardəşe ki, bı dəvardə soronədə bənə Hacı Mevsum Səmədovi, Hacı Abqul Suleymanovi, Hacı Taleh Bağırzadə alimon de terrorçiə bıhtoni bə dırozmuddətinə zindonə cəzo məhkun bıən. Bənə Hacı Mevsumi əxlağinə odəmi narkotikə ittiham çoko doe bəbe? Təəssufinə koe ki, Az.R-ədə dini əleyhdaron “Sahib-əz–Zaman” nominə mədrəsə rıjnişone, çey vırə bə avtoparkinq peqordınişone. Boku devləti rəhbəron daima iddia kardedən ki, bə şəhrıvandon votə tənğidon de hurməti munasibət nişon dodən. Əmo dindaron bə qıley tənğidiə fikri qorə bə zindon dəğande, bəvon hətto ıştə kədə dini mərasimon dəvuniə icazə nıdoe vindeədə bə cəvon votəyon bovə karde bedəni.

Hoccətul-islam Əzizi ıştə xutbə orəxədə bə Az.R devləti rəhbəriyyəti muraciətən votəşe ki, bə İmom Əli (ə) və İmom Huseyn (ə) məhəbbət çe Azərbaycani xalqi dıl`ədəy. Im məhəbbət və eşği hiç qıley ğıvvə məhv karde nibəzıne. Çand ruj bə nav Az. Respublika rəhbəri dini məhbuson i ğism azad kardışe, umumon heste ki, əv nezə vaxtonədə digər islamiə məhbusonən çe zindono azad bəkarde.

Mərasimi orəxədə Kərbəlayi Ğadir Sai Nardarani şəhidon mədh kardə şeeron ifa kardışe.