İronədə muəllimon ruji əziz qəte.

Imruj 5 şanbə mayə manqi 2 bərobər de ordibeheştə manqi 12 ostad şəhid Morteza Motəhəri şəhodəti sorəqardışe və İronədə muəllimon yolə məğami ğədr zıne ruje.

İslam əzın,alim və filəsof ostad Morteza Motəhəri şəhodəti bəpeştə ki 1979 nə sori mayə manqi 2 bərobər de hicri şəmsi 1358 nə sori ordibeheştə manqi 12 minnə ruji deşmenon tərəfo bə şəhodət rəsə ım ruj İron İslam Respublika təğvimədə muəllimon ruj nom noə bə.

şəhid Motəhəri Ğom şəhrədə ıştə təhsili devranədə elmiyə elmiyə məsəlon umuteku əlavə siyasiyə mubarizəonədə həm fəal be və islamiyə inğilabi hərəkati bino beku çı hərəkati fəalonku və İron İslam Respublika təsisəkə mərhum imom Xomeyni nezə dustunku be.

ostad Motəhəri xosiyətonku islamiku əçəy nığılə aqahəti iyən ıştə əsri məsəlon,ictimaiyət,siyasi və mədəniyə məsəlonku aqahəti be.

şəhidə alim ostad Morteza Motəhəri 12 sorətiku islamiyə elmon mığədəmə təhsilış bino karde və ıştə təhsilati komil kardeyu yolə ostadon mincumlə Ayətullah Borocerdi,Əlamə Təbatəbaei və mərhom İmom Xomeyniku Ğomı diniyə elmiyə mərkəzdə bəhrəş barde.