Asiya ğərb və islam dınyoədə İron və İrağ 2 qılə muhimmə kişvəronin.

İroni həmmə silohinə ğıvvon ğərorqo rəis bə İron və İraği miyono əloğəon inkişof təkidış karde.

Qeneral Muhəmməd Bağıri zinə de İraği hezbi aliyə heyəti vindemonədə votışe: İraği əmniyyət, oromtəti səbarzəti və inkişof çı İroni əmniyyət və inkişof hisob bıdə və əmə deştə həmmə ğudrəti İraği kənodəmon.

İroni həmmə silohinə ğıvvon ğərorqo rəis əlovəş karde: 2 qılə kişvəri miyono muğaviləon bəpe ciddi əməli bıbu ta stratejik sənaye iyən texniki koon dəvom peydo bıkə.

Əv bə məntəğə vəzyət iyən de terorizm mubarizə barədə sahədə bə İron və İraği silohinə ğıvvon miyono həmkarion təcrobə işorəş karde iyən əloğəon zəminə çımiku vey hevoj zınəş be.

Qeneral mayor Bağıri ijən xarıci mıdoxiləkə kişvəron təhdidon vey qətero bə məntəğə kişvəron miyono əloğəon əhəmiyyət təkidış karde.

İraği hərbi Avyasiya ğıvvon fərmondə Hamed Ətiyə həm ım vindemonədə İroni bə təğdiri loyiğ zınə bəpeştə bə İron-İraği miyono əloğəon inkişof təkid kardışe.

Əv əloğəon bə inkişofi tərəf zınəş be və votışe: de İŞİD mubarizə barədə zəmon Bəğdadi hukuməti məhv beyro kam mande və qıləy şərayetədə ki çəmə mıttəfiğon bə dəvom neştə bən fəğət İron bə mə koməkış ka.

İroni sepah təşkilati hərbi Avyasiya ğıvvon fərmondə qeneral Əmir Əli Hacizodə həm de İraği hərbi məxsusə heyəti vindemon karde cərəyonədə votışe ki sepah İrağədə İŞİD-i hucumi iminə rujonku İraği dıvlət və millət iyən hərbion kənoədə be.

İraği ım ali hərbi heyəti səfəri cərəyonədə bə 2 qılə kişvəri miyono hərbi sənaye və texnoloqiya baxşədə həmkarion inkişof təkid be.