İrağçi: İroni stratejik səbr təmom be.

İroni xarıci vəziri siyasi muavin Viyanaədə jurnaliston cəmədə bə ətomiyə sazışi vədə Avropa bədəhdion iyən ehdemonon əməl nıkarde işorəş karde və votışe: İron çımiku vey karde nibəzne i tərəfi iyən cayli bə ətomiyə sazış əməl bıkoy ya xot ım sazışədə bemando.

İrağçi təsdiğış karde: Avropa siyasiyə nəzər əmni xoşhal kardedə əmmo ətomiyə sazışi oqəte xoto siyasi sohbəton və sə ni iyən bəpe əməliyə hərəkəton əncom bıbu.

Əv bə Viyanadə ımrujnə ətomiyə mıştərikə iclos işorəş karde və votışe: İron umidvare ki ımrujnə iclosədə Avropa kişvəron ətomiyə sazışi barədə əməli və hiss kardəninə ğəroli elan bekon çən əqə jıqonekon İron bə ətomiyə sazışi əsos ıştə ehdemonon kam karde xoto kamilən ciddi və zumand əməl bəkarde.

İroni xarıci vəziri siyasi muavin zinə Viyanadə "i tərəfi sanksiyaon nəticə" nomo bıə iclosədə həm bə Amerkə anti İron sanksiyaon işorəş karde və votışe: Amerkə dollariku bənə qıləy canqi silah istifodə kardedə.

Xəbə ome zinə şəv həm Viyanaədə ətomiyə sazışi çərçivədə İron, Rusiyə və Çini miyono 3 tərəfiyə iclos de Seyed Əbbas İrağçi rəisəti bərpo bıə.

İroni ətomiyə sazışi mıştərikə kamissiya tojə iclos 4+1 de kişvəron siyasi mudiron iyən xarıci vəziron muavinon iştiroki ımruj Viyanaədə bərpo bəbe.